Ստրասբուրգում գտնվող ՀՀ նախագահ Սերժ Սարգսյանը, ներկայացնելով ԵԽ նախարարների խորհուրդը նախագահող Հայաստանը, ելույթ ունեցավ Եվրախորհրդի Խորհրդարանական վեհաժողովի նիստում: Ելույթից անմիջապես հետո պատգամավորները հնարավորություն ստացան հարցեր ուղղել ՀՀ նախագահին:
Ինչպեսև ենթադրվում էր, հարցերի մեծ մասը վերաբերում էր Հայաստանի` արտաքին քաղաքական վեկտորի վերջերս կատարած ընտրությանը: ԵԽԽՎ ամբիոնից եվրոպացի պատգամավորներից մեկն ակնարկեց, որ ՌԴ-ն ճնշումներ է բանեցրել Հայաստանի նկատմամբ անվտանգության բաղադրիչով և ԼՂ հակամարտության խաղաղ կարգավորման գործընթացում ունեցած դերակատարությամբ, ապա բառացիորեն հարցրեց. «Ստացե՞լ եք արդյոք ՌԴ-ից այնպիսի մի առաջարկ, որը չեք կարողացել մերժել»:
Ի պատասխան` ՀՀ նախագահ Սերժ Սարգսյանն ասաց, որ ՀՀ-ն իր ուղուց չի շեղվել, ՄՄ-ն ՌԴ չէ: Ի դեպ, ՀՀ նախագահն ասաց, որ ԵՄ-ի հետ իրենց բանակցությունների սկզբից իրենց գործընկերներին ասել են, որ իրենց քաղաքականությունը շահերի համադրման և ոչ թե հակասության մեջ է: Եվ ՀՀ գործընկերները համաձայնել են` ասելով, որ Արևելյան գործընկերությունն ուղղված չէ որևէ այլ երկրի, կառույցի դեմ, և որ ԱԳ-ն մշտապես կարող է փոխլրացնել այլ կառույցների կողմից տարվող աշխատանքը:
«Հիմա էլ մենք պատրաստ ենք ԵՄ հետ Ասոցացման համաձայնագիր ստորագրելուն, բայց մեր հայտարարությունից հետո Եվրոպական հանձնաժողովի մեր գործընկերներն ասացին, որ կա հակասություն ՄՄ-ի և Ազատ առևտրի պայմանագրի միջև: Մենք առաջարկեցինք ԱՀ ստորագրել, որը հիմնական քաղաքական բարեփոխումներ էր ենթադրում: Մենք վճռական ենք այդ բարեփոխումներն իրականացնելու հարցում, հիմա այդ գործընթացն է գնում: Ճնշումների մասին խոսելն ավելորդ է, չեմ կարող հրապարակավ ոչ ճշմարտությունն ասել, ՌԴ, ՄՄ որևէ պաշտոնյա կես բառ անգամ չի ասել ՀՀ անդամակցության անհրաժեշտության մասին, մենք ենք այդ ցանկությունը հայտնել` ելնելով պարզ իրողությունից. 20 տարուց ավելի գտնվում ենք ռազմական անվտանգության մի համակարգում, որի բաղկացուցիչ մասերն են այն պետությունները, որոնք ՄՄ են ձևավորել, և մենք չենք կարող մեկուսանալ աշխարհատնտեսական այն տարածքից, որի հետ 20 տարի համագործակցում ենք: Մենք շարունակելու ենք սերտ համագործակցությունը ԵՄ-ի հետ, մեր ցանկությունը դա է»,- ասաց ՀՀ նախագահ Սերժ Սարգսյանը:
