Մեծ Բրիտանիայի Դերբի քաղաքում փակվել է մուսուլմանական հանրային դպրոցն այն բանից հետո, երբ անցկացվել են կառավարական տեսչական ստուգումներ՝ հաղորդում է BBC-ն:
Կրթության չափորոշիչների վերահսկման վարչության (Office for Standards in Education, Ofsted) տեսուչները որոշել են ստուգել «Ալ-Մադինա» դպրոցն այն բանից հետո, երբ ԶԼՄ-ներում հաղորդագրություն է տարածվել այն մասին, որ ուսումնական հաստատությունում սահմանված են վարքի խիստ կանոններ՝ իսլամի չափանիշներին համապատասխան: Մասնավորապես, հաղորդվել է, որ ինչպես դպրոցում սովորող աղջիկները, այնպես էլ ուսուցչուհիները՝ անկախ նրանից, թե ինչ կրոն են դավանել, պարտավոր են հիջաբ կրել: Որոշ դասավանդողներ ասել են, որ դասի ժամանակ աղջիկներին թույլ են տվել նստել միայն վերջին շարքերի նստարաններին:
Ստուգման արդյունքները դեռևս չեն հրապարակվել, և տեղի իշխանությունները դեռևս պաշտոնական որոշում չեն կայացրել դպրոցի հետագա ճակատագրի մասին: Այնուամենայնիվ, տեսչական ստուգումից անմիջապես հետո դպրոցի տնօրենը որոշել է փակել դպրոցը:
«Անվտանգության ոլորտում առկա խնդիրների և առողջության պահպանման կապակցությամբ ես որոշում եմ կայացրել փակել դպրոցը տարրական և միջին դասարանների համար այնքան ժամանակ՝ մինչև վստահ կլինեմ, որ նրանք ուսումնական հաստատության տարածքում անվտանգ են»,- ասվում է դպրոցի կայքում հրապարակված հայտարարության մեջ, որը ստորագրված է տնօրենի կողմից:
