«Կախված է նրանից, թե ընտրությունն ինչի մեջ կլինի: Եթե ընտրությունը դրված լինի թեթև ինչ-որ հարցերի մեջ՝ ոչ այնքան էական, ապա Ղազախստանն, ամենայն հավանականությամբ, կաջակցի Ադրբեջանին, կոնֆլիկտային հարցերում՝ երևի թե ոչ մեկին»,- «Առաջին լրատվական»-ի հետ զրույցում նման տեսակետ հայտնեց ղազախ քաղաքագետ Վասիլի Միսնիկը՝ պատասխանելով այն հարցին, թե եթե Ղազախստանի առջև Ադրբեջան և արդեն Մաքսային միության անդամ Հայաստան դրված լինի, ի՞նչ ընտրություն կկատարի Ղազախստանը:
Քաղաքագետը հավելեց, որ եթե ստեղծվի այնպիսի իրավիճակ, ինչպիսին է, օրինակ, Ռուսաստանի և Վրաստանի հակամարտությունը, ապա Ղազախստանը հավանաբար չեզոք դիրք կգրավի. «Ավելի լուրջ հարցերում Ղազախստանը կա՛մ Ռուսաստանի դիրքորշմանը կլինի, կա՛մ չեզոք դիրքորոշում կունենա: Վրաստան-Ռուսաստան պատերազմում Ղազախստանը չէր կարող ո՛չ Ռուսաստանին աջակցել, ո՛չ Վրաստանին, հետևաբար չեզոք դիրք զբաղեցրեց»:
Այդուհանդերձ Վ. Միսնիկն ընդգծեց, որ Ղազախստանի համար շատ կարևոր է լավ հարաբերություններ ունենալ Ադրբեջանի հետ. «Կարևոր է Կասպից ծովով, Ադրբեջանի և Վրաստանի տարածքով դեպի Սև ծով մուտք ունենալը, այն անկախ է Ռուսաստանից, դա այլընտրանք է Ռուսաստանին, բայց քանակական իմաստով Ադրբեջանի և Ղազախստանի կապերն այնքան էլ մեծ չեն»:
Խոսելով Հայաստանի՝ Մաքսային միությանն անդամագրվելու որոշման մասին, մեր զրուցակիցը վերահաստատեց նախկինում հնչեցրած իր այն տեսակետը, թե Ղազախստանին այնքան էլ չի հետաքրքրում դա, սակայն, ըստ նրա, Ղազախստանը դեմ չի լինի Հայաստանի անդամակցությանը. «Քաղաքական որոշումը կայացվելու է բարձր՝ նախագահ Նազարբաևի մակարդակով: Այսպիսի իրավիճակ է՝ եթե Նազարբաևի մոտ Ռուսաստանի հետ հակամարտության լուրջ պատճառ չհայտնվի (իսկ դա Նազարբաևի մոտ չի հայտնվում, նա կարողանում է Ռուսաստանի հետ հարցեր լուծել), ուրեմն Մաքսային միությանը Հայաստանի անդամագրման ոչ մի տեխնիկական խոչընդոտ Ղազախստանը չի ստեղծի»:
