Ընտրողների հետ հանդիպումների ժամանակ Վրաստանի նախագահի թեկնածուներից միայն Դավիթ Բաքրաձեն է խոսում հայ-վրացական հարաբերությունների մասին: «Առաջին լրատվական»-ի հետ զրույցում այս մասին հայտարարեց «Բազմազգ Վրաստան» կազմակերպության ղեկավար Առնոլդ Ստեփանյանը՝ հավելելով, որ նախագահի մյուս թեկնածուները այդ թեմային գրեթե չեն անդրադառնում:
«Միացյալ ազգային շարժումից Դավիթ Բաքրաձեն, իհարկե, խոսում է հայ-վրացական հարաբերությունների զարգացման մասին՝ չնայած դա լրատվամիջոցների կողմից չի լուսաբանվում: Ըստ հարցումների տվյալների՝ ինչպես երևում է, ֆավորիտը Գեորգի Մարգվելաշվիլին է՝ «Վրացական երազանք» կուսակցությունից: Նա դեռևս Ջավախքում ընտրողների հետ չի հանդիպել: Ճիշտ է՝ նա եղել է Ծալկայում և Ախալցխայում, սակայն հայ ազգաբնակչության հետ հատուկ հանդիպելու նպատակ չի հետապնդել»,- ասաց Առնոլդ Ստեփանյանը:
Հարցին՝ թեկնածուներից որի՞ն են համակրում վիրահայերը, նա պատասխանեց, որ իր կանխատեսումներով՝ Ջավախքում հայերն ամենամեծ թվով ձայները կտան Մարգվելաշվիլիին, հետո Բաքրաձեին, իսկ վերջում՝ Նինո Բուրջանաձեին՝ «Ժողովրդավարական շարժում»-ից:
«Մայրաքաղաք Թբիլիսիում ևս ձայների մեծամասնությունն, ըստ իս, կստանա Գեորգի Մարգվելաշվիլին: Ընդդիմությունը դեռևս այնքան ուժեղ չէ, որ հաղթի ընտրություններում: Միաժամանակ դեռ դժվար է ասել, թե ով կլինի երկրորդը՝ Բաքրաձե՞ն, թե՞ Բուրջանաձեն»,- ասաց «Բազմազգ Վրաստան» կազմակերպության ղեկավարը:
Հիշեցնենք, որ Վրաստանում նախագահական ընտրությունները կկայանան 2013 թվականի հոկտեմբերին:
