ՀՀ Ազգային ժողովի ՀԱԿ խմբակցության պատգամավոր Գագիկ Ջհանգիրյանն առաջարկում է «Զինծառայողների և նրանց ընտանիքների անդամների սոցիալական ապահովության մասին» օրենքում փոփոխություններ կատարել: Այսօր՝ ԱԺ հայտարարությունների ժամին Ջհանգիրյանը նշեց, որ ամիսներ շարունակ ազատամարտիկները դժգոհում են իրենց սոցիալական ծանր վիճակից, առողջապահական խնդիրներից, անուշադրությունից, անհանգստացած են արտագաղթի ահագնացող տեմպերով, երկրի ճգնաժամային վիճակով և այլ խնդիրներով:
«Նրանք այսօր էլ պատրաստ են զենքը ձեռքին պայքարել մեր երկրի համար: Նրանցից հատկապես աչքի ընկնողներին ահաբեկելու անհաջող փորձերից դուրս՝ իշխանություններն այդպես էլ ականջալուր չեն լինում նրանց խնդիրներին, խնդրին չի անդրադառնում նաև
ԱԺ պրոֆիլային հանձնաժողովը»,- ասաց նա՝ հիշեցնելով, որ հակառակորդին պարտադրված խաղաղությունը ձեռք է բերվել առաջին հերթին նրանց արյան գնով:
ՀԱԿ խմբակցությունը իբրև խնդրի լուծման առաջին քայլ առաջարկում է լրամշակել օրենքը, ուստի դիմում է ԱԺ նախագահին՝ օրենքը լրամշակող աշխատանքային խումբ ձևավորել բոլոր խմբակցություններից և անկախ պատգամավորներից:
Լուսանկարը` PanARMENIAN Photo-ի
