«Պարալլելս» անկախ կինոընկերությունը, որն իր գործունեությունը սկսել է 2005-ից, 2012-ից իրականացնում է նորահայտ կինեմատոգրաֆիստների առաջին ֆիլմերի աջակցության ծրագիր: Այս տարի արտադրել է առաջին կարճամետրաժ ֆիլմը` ռեժիսոր Մարինե Զաքարյանի «Փասիանի որսորդը», ըստ Վիլյամ Սարոյանի համանուն պատմվածքի: Հայ հանդիսատեսը հնարավորություն կունենա հոկտեմբերի 4-ից այն դիտել «Մոսկվա» կինոթատրոնում:
Ի դեպ, «Փասիանի որսորդը» ֆիլմը 2012-ին արժանացել է «Հայակ» ազգային կինոմրցանակին՝ «Լավագույն դեբյուտ» անվանակարգում: Ռեժիսորը նշեց, որ Մոսկվայի փառատոնում ֆիլմը շատ լավ ընկալվեց, շատ լավ դիտեցին, բայց որքան մոտենում է ամսի 4-ը, այնքան մեծանում է հայ հանդիսատեսի առջև լարվածությունը:
Նա նշեց, որ հաջորդ՝ «Կիսալուսնի ծովածոցը» ֆիլմի նկարահանումներն ավարտված են, ֆիլմն արդեն արտադրության փուլում է: Կինոընկերությունը նախատեսում է «Լուսավոր շրջան» ֆիլմն ամբողջովին ավարտին հասցնել մինչև գարուն:
Հովհաննես Գալստյանը, որը «Պարալլելսի» հիմնադիրն է, նշեց, որ իր նպատակն է գրավել միջազգային շուկան, այսինքն՝ ֆիլմերը պետք է հետաքրքիր լինեն բոլոր մարդկանց, հետաքիրքր լինեն և գրավեն մարդկանց հոգիները, սրտերը, անկախ նրանից՝ որտեղ են ապրում:
Ասուլիսի ընթացքում Հովհաննես Գալստյանը կապ հաստատեց միջազգային կիոարտադրող Լյուկ Նթոնգայի հետ, որը Հովհաննես Գալստյանի հետ համագործակցում է 2009-ից: Նա նշեց, որ ինքը հետաքրքրված է «Կիսալուսնի ծովածոցը» ֆիլմով: Այս պատմության մեջ, նրա խոսքով, հետաքրքիր է այն, թե որոշումները, որ մենք կայացնում ենք անցյալում, ինչ հետևանքներ են թողնում ներկայի վրա: «Բոլորս էլ մեր կյանքում ինչ-որ որոշում կայացրել են, դա մեզ հետապնդում է և ազդում մեր կայացրած որոշումների վրա, որ ներկայանում են այս որոշումների մեջ: Ֆիլմը պետք է հետաքրքրի հատկապես կանանց»,- ասաց նա:
Մարինե Զաքարյանը, խոսելով «Փասիանի որսորդը» ֆիլմից, նշեց, որ այն տարբերվում է առհասարակ գրական գործը էկրանավորելու փորձերից: Նա չթաքցրեց, որ ֆիլմը, իր կարծիքով, խոցելի տեղեր ունի: Ի դեպ, այն նկարահանվել է երկու միլիոն դրամ բյուջեով:
Ինչ վերաբերում է «Լուսավոր շրջանին», ապա բանախոսները նշեցին, որ նախագծի առաջին ներկայացումը տեղի է ունեցել նախորդ տարի՝ Կաննի փառատոնում, և նախատեսվում է, որ ֆիլմը կավարտեն 2015-ին: Մինչև այդ, սակայն, անհրաժեշտ է 1,2 միլիոն դոլարի ներդրում անել:
