Ինչ ենք հիմնականում ներմուծում: Ուսումնասիրելով Ազգային վիճակագրական ծառայության տվյալները` պարզվում է, որ հանքահումքային արտադրանքը ոչ միայն արտահանման կառուցվածքում է առաջատարը, այլ նաև ներմուծման:
Այսպես, այս տարվա առաջին 7 ամսիներին Հայաստանից արտահանվել է 235 մլն 873.3 հազար դոլարի հանքահումքային արտադրանք և միաժամանակ ներմուծվել 490 մլն 880.7 հազար դոլարի հանքահումքային արտադրանք: Այսինքն, մենք ներմուծում ենք ավելի քան 2 անգամ ավելի շատ հանքահումքային արտադրանք, քան արտահանում ենք:
Հետաքրքիր է նաև վիճակագրությունն արտահանման կառուցվածքում 2-րդ տեղը զբաղեցնող ոչ թանկարժեք մետաղներ և դրանցից պատրաստված իրերի գծով: Այսպես, նույն ժամանակում Հայաստանից արտահանվել է 188 մլն 641.1 հազար դոլարի և զուգահեռ ներմուծվել 160 մլն 74.2 հազար դոլարի:
Արտահանման կառուցվածքում 3-րդ տեղը զբաղեցնող պատրաստի սննդի արտադրանքի արտահանման ծավալը 154 մլն 715.1 հազար դոլար է, իսկ միաժամանակ ներմուծվում է 207 մլն 707.6 հազար դոլարի: Արտահանման ծավալով 4-րդը թանկարժեք և կիսաթանկարժեք քարեր, թանկարժեք մետաղներ և դրանցից իրերն են, որոնց արտահանումը 106 մլն 788.5 հազար դրամ է, իսկ ներմուծումը` 159 մլն 290.5 հազար դոլար:
Եվ արտահանման հնգյակը եզրափակող բուսական արտադրանքի արտահանման ծավալը հետ է մնում ներմուծման ծավալից մոտ 3 անգամ: Արտահանվում է 34 մլն 986.9 հազար դոլարի, իսկ ներմուծվում` 114 մլն 26.1 հազար դոլարի արտադրանք:
Այսինքն, նույնիսկ արտահանման ծավալում առաջատար գրեթե բոլոր ապրանքների մասով Հայաստանն ավելի շատ ներմուծում է, քան արտահանում:
