Ադրբեջանական APA լրատվական գործակալության փոխանցմամբ, Ադրբեջանում Թուրքիայի դեսպան Հուլուսի Քըլըչը լրագրողներին հայտարարել է, թե Թուրքիան մեծ ակնկալիքներ ունի կազանյան հանդիպումից.
«Թուրքիան մշտապես կանգնած է Ադրբեջանի կողքին։ Մենք պատրաստ ենք մեր հնարավորությունների սահմանում օգնություն ցուցաբերել ղարաբաղյան հակամարտության կարգավորմանը։ Պաշտոնական Անկարան ցանկանում է, որ Կազանում ընդունվի ղարաբաղյան հակամարտության կարգավորման որոշումը։
Մենք շնորհակալություն ենք հայտնում բոլոր նրանց, ովքեր ներդրում են ունեցել այդ գործում՝ Դմիտրի Մեդվեդևի նախագահությամբ։ Եթե մենք լուծենք այդ խնդիրը, ապա «կլուծվեն» նաև տարածաշրջանի մյուս խնդիրները, կբացվի հայ-թուրքական սահմանը։ Մենք «պատրաստ ենք» անել խնդրի լուծման համար պահանջվող ամեն ինչ»։
Իր եզրափակիչ խոսքում թուրք դեսպանը նշել է, որ ղարաբաղյան հակամարտությունը պետք է վաղուց կարգավորված լիներ, սակայն այդ գործընթացը ձգձգվում է, և ժամանակի ընթացքում մարդկանց համբերությունը սկսում է հատել։
Հիշեցնենք, որ Հուլուսի Քըլըչն Ադրբեջանում Թուրքիայի դեսպան է նշանակվել 2008 թվականի մարտին։
