ԱՄՆ նախագահ Բարաք Օբաման միջոցառումներ է ընդունում՝ բարելավելու հարաբերությունները Իրանի և Մերձավոր Արևելքի արաբական պետությունների միջև՝ գրում է The Wall Street Journal-ը:
Ամերիկացի պաշտոնատար անձինք խոստովանում են, որ Պարսից ծոցի երկրները, մասնավորապես՝ Սաուդյան Արաբիան, ԱՄԷ-ն և Բահրեյնն անհանգստացած են Իրանի հետ ԱՄՆ-ի մերձեցմամբ: Արաբական երկրներն անհանգստանում են այն պատճառով, որ Իրանը կարող է օգտվել Վաշինգտոնի հետ իր բարելավվող հարաբերություններից՝ Մերձավոր Արևելքում գերիշխելու համար:
Իսրայելն ու Պարսից ծոցի մի շարք դաշնակից պետություններ անհանգստություն են հայտնում ԱՄՆ-ի ու Իրանի մերձեցման տեմպերի առնչությամբ՝ հաստատելով, որ վերջինս կկիրառի դիվանագիտական քողը՝ իր միջուկային աշխատանքները խթանելու համար
Իրանի նոր նախագահ Հասան Ռուհանին բազմիցս հերքել է այդ ենթադրությունը:
Իսրայելի վարչապետ Բենիամին Նեթանյահուն այսօր ԱՄՆ-ում կհանդիպի Բարաք Օբամայի հետ: Նեթանյահուն հայտարարել է, որ կօգտվի ԱՄՆ այցելելու առիթից ու կպատմի ողջ ճշմարտությունն իրանական միջուկային ծրագրի վերաբերյալ: Հանդիպման նախապատրաստություններով զբաղվող պաշտոնյաների խոսքով՝ Օբաման հանդիպմանը կհայտնի, որ ԱՄՆ-ը որոշումներ կընդունի Իրանի գործողությունների փոփոխության դեպքում, ոչ թե հռետորաբանության հիման վրա:
