Գարեգին Չուգասզյանն իր ֆեյսբուքյան էջում գրառում է տեղադրել «Արևմտամետ գրաքննության պերճանքն ու թշվառությունը» վերտառությամբ, որում մեր կայքին, ըստ էության, մեղադրում է երեկվա իր հարցազրույցը գրաքննելու և իշխանության պատվեր կատարելու մեջ:
Ավելորդ է ասել, որ հիշյալ հարցազրույցը ոչ թե գրաքննվել է, այլ ընդամենը խմբագրվել է, ինչը լրատվություն մատուցելու կարևոր գործառույթ է:
Ի դեպ, խիստ տարօրինակ է, որ Չուգասզյանն որակումներ է տալիս կայքի, որը պարբերաբար, առանց բովանդակային միջամտության, հանրությանն է հասցնում նրա և մյուս «ծռերի» խոսքն` դրա բովանդակության հետ համաձայն չլինելով: Մենք համարել ենք և համարում ենք, որ հասարակությունն իրազեկված լինելու իրավունք ունի և հարկ չենք համարում քաղաքական խոսքի ֆիլտրումը: Դրան զուգահեռ` մենք չենք զլանում բարձրաձայնել մեր տեսակետներն` անկախ այն հանգամանքից, թե դրանք ինչքանով դուր կգան իշխանությանը կամ ՊՊԾ գունդը գրաված «ծռերին»:Մենք չենք աշխատում իշխանության և` իրենց քաղաքական որակով ու անհանդուրժողականությամբ նրանց չզիջող «ծռերի» համար: Մեր խոսքի միակ հասցեատերը եղել և մնում է հասարակությունը:
Ի դեպ, եթե առաջնորդվեինք բացառապես Չուգասզյանի ասած արևմտյան չափանիշներով, ապա մեր կայքն այսքան բաց չէր լինի «ծռերի» առաջ, ովքեր արևմտյան դեմոկրատիայի չափանիշներով մարգինալներ կամ նույնիսկ` ահաբեկիչներ են: Եթե առաջնորդվենք Չուգասզյանի խոտոր տրամաբանությամբ, ապա նա չի հայտնաբերվում, որովհետև հավանաբար կապված է հատուկ ծառայությունների հետ: