Կառավարության այսօրվա նիստի ժամանակ ՀՀ էներգետիկայի և բնական պաշարների նախարար Արմեն Մովսիսյանը հերքեց «Նաիրիտի» վերաբերյալ տարածված մի շարք «լուրեր»։ Նրա խոսքով՝ լուրեր են տարածվում, թե «Նաիրիտի» հիմնական բաժնետերերը ներգրավված են Հայաստանի տնտեսության տարբեր ոլորտներում, մասնավոր և պետական կառույցներում։ «Նաիրիտի հիմնական բաժնետերերը Հայաստանում որևիցե՝ թե՛ պետական, թե՛ մասնավոր ստրուկտուրաներում ներգրավվածություն չունեն»,- ասաց նախարարը։
Անդրադառնալով «Նաիրիտի» սարքավորումները ապամոնտաժելու և վաճառելու վերաբերյալ մամուլի հրապարակումներին՝ Ա. Մովսիսյանը նշեց, թե գործարանում 4 սերնդի սարքավորումներ կան։ Դրանց մի մասը, ըստ նախարարի, ենթարկվել են բարոյական մաշվածության, այսինքն՝ հայտվել են այդ ֆունկցիաներն իրականացնող ավելի լավ տեխնոլոգիաներ ու սարքավորումներ։ Մյուս կողմից էլ, ըստ նախարարի, որոշ սարքավորումներ այնքան են հնացել, որ վտանֆգավոր է դարձել տեխնիկական գործընթացներում դրանց օգտագործումը։ Նախարարի խոսքով՝ այս պարագայում բնական է, որ որոշ սարքավորումներ պետք է ապամոնտաժվեն և վաճառվեն։
«Նաիրիտում ստեղծված է հատուկ հանձնաժողով՝ եռաստիճան, որ գնահատում են թե՛ տեխնիկական, թե՛ շուկայական արժեքները»,- ասաց Ա. Մովսիասյանը։ Նրա խոսքով՝ «Նաիրիտը» մոտ 4 ամսվա աշխատավարձի պարտք ունի։ «Նաիրիտում» եղել են ռուսական և արտասահմանյան խոշոր քիմիական ընկերությունների մասնագիտական խմբեր, այդ թվում «Սիբուլի»՝ ամբողջ 25 հոգուց բաղկացած աշխատանքային խումբ, «Նիժնի Կամսկ Շինպրոմի» աշխատանքային խումը , որոնք բավականին բարձր են գնահատել մեր ունեցած ինչպես տեխնիկական պոտենցիալը, այնպես էլ մարդկային ռեսուրսները, հատկապես մասնագիտական պոտենցիալը, և սա հույս է ներշնչում, որ մենք կարող ենք «Նաիրիտը» այս վիճակից հանել»,- հայտարարեց Ա. Մովսիսյանը։
Նա նշեց, որ «Նաիրիտի» կուտակված պարտքը մոտ120-130 մլն դոլար է, որի հիմնական մասը բաժին է ընկնում ԱՊՀ Միջպետական բանկին, «քանի որ Միջպետական բանկն էր այս տարիների ընթացքում ֆինանսավորում «Նաիրիտ»-ի աշխատանքը»։ «20-25 մլն-ը ներքին պարտավորություններն են հայկական բանկերին աշխատավարձի գծով, էներգակիրներին և այլն»,- նշեց նախարարը։
