«Մենք հիմա ստորագրահավաք ենք անցկացնում Վոլոդյա Ավետիսյանին ազատ արձակելու պահանջով»,- այսօր լրագրողների հետ հանդիպմանը ասաց «Խաչակիր» ՀԿ-ի խորհրդի նախագահ Գագիկ Սարուխանյանը:
«Երբ առաջին ատյանի դատարանում նրան կալանավորելու որոշում էր կայացվում, փաստաբան Արա Զաքարյանը դատավորին բացարկ հայտնեց՝ կողմնակալ վերաբերմունքի համար…
Վոլոդյա Ավետիսյանին գրավով ազատ չարձակեցին՝ մեկնաբանելով, որ դատարանն աննպատակահարմար է համարում, քանի որ նա կարող է խոչընդոտել և նոր հանցագործություն կատարել: Մենք պատրաստվում ենք որոշումը բողոքարկել վերաքննիչ քրեական դատարանում, որպեսզի նրան գրավով ազատ արձակեեն»:
Սարուխանյանը հավելեց, որ ստորագրահավաքն անցկացվում է միայն ազտամարտիկների շրջանում. «Այս պահին մոտ 350 ազատամարտիկ ստորագրել է, և դեռ էլի միացողներ կլինեն»:
«Առաջին լրատվական»-ի հարցին՝ համակարգային փոփոխություն պահանջող ազատամարտիկները սատարո՞ւմ են Վոլոդյա Ավետիսյանին և ստորագրե՞լ են արդյոք, Դ. Սարուխանյանը պատասխանեց. «Կան ընկերներ, որ ստորագրում են, զորակցում, ամբողջականը ո՞րն է՝ մոտ 30.000 ազատամարտիկ կա, այս պահին 350-ն են ստորագրել: Ես անձամբ չգիտեմ՝ Ազատության հրապարակում ովքեր են: Ինչ վերաբերում է նրանց, ովքեր հացադուլ էին հայտարարել, ապա՝ ոչ, նրանք չկան, իսկ երկրապահ կամավորականներից ստորագրել են»:
Ազատամարտիկ Սամվել Մկրտչյանն էլ պատասխանելով նույն հարցին՝ «Առաջին լրատվական»-ի հետ զրույցում ասաց. «Ես գիտեմ, որ վերևից տղաներին հրահանգել են չգալ, նստացույցերին չմասնակցել, բայց տղերքը գալիս են: Պարզապես իրենք ասում են, որ մենք՝ լինելով ազատամարտիկ, իրավունք չունենք միայն մեր մասին մտածելու, ժողովրդի մասին էլ պետք է մտածել, և այդ հարցերն էլ պետք է բարձրացնենք:
Իսկ մենք ունենք հետևյալ դիրքորոշումը՝ այսօր մենք մեր խնդիրներն ենք բարձրացնում, հետո նոր ժողովրդինը կբարձրացնենք. եթե իշխանություններն ի վիճակի են ազատամարտիկների խնդիրները լուծելու, հետո կամաց-կամաց ժողովրդի խնդիրներին կանցնեն: Ներկայումս մեր խնդիրն ենք բարձրացնում»,- եզրափակեց նա:
