2013թ. սեպտեմբերի 24-25-ը ՀՀ ԱԳՆ-ում անցկացվել է ՀՀ Վարչապետի 2013թ. հուլիսի 15-ի թիվ 562-Ա որոշմամբ ստեղծված Աշխատանքային խմբի և Միջազգային փորձագետների առաջին աշխատաժողովը:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ ՄԱԿ-ի ԱԽ 1540 բանաձևը, որն ընդունվել է 2004թ., հանդիսանում է զանգվածային ոչնչացման զենքերի տարածման դեմ պայքարի առանցքային միջազգային գործիքներից մեկը: Բանաձևի իրականացմանը համալիր աջակցություն տրամադրելու նպատակով հիմնվել է ԱԽ 1540 կոմիտեն:
Աշխատանքային խումբը ստեղծվել է ՄԱԿ ԱԽ 1540 բանաձևի իրականացման գործողությունների ազգային ծրագիր մշակելու և ԵԱՀԿ ու այլ միջազգային գործընկերների հետ այդ ոլորտում համագործակցության գործնական քայլեր ձեռնարկելու նպատակով: Այն ներառում է ՀՀ արտաքին գործերի, Էներգետիկայի և բնական պաշարների, Արտակարգ իրավիճակների, Էկոնոմիկայի, Բնապահպանության, Առողջապահության, Գյուղատնտեսության նախարարությունները, ինչպես նաև` ՀՀ ԱԱԾ, Պետական եկամուտների և Միջուկային անվտանգության պետական կոմիտեները:
Միջազգային փորձագետները ներկայացնում են ԵԱՀԿ-ն, ԵՄ Քիմիական, կենսաբանական, ռադիոլոգիական և միջուկային հարցերով Թբիլիսիի Գերազանցության տարածաշրջանային կենտրոնը, ՄԱԿ-ի Միջտարածաշրջանային հանցագործությունների և արդարադատության հարցերով հետազոտական ինստիտուտը, ՄԱԿ ԱԽ 1540 կոմիտեն:
Զանգվածային ոչնչացման զենքերի և դրանց փոխադրման միջոցների տարածման դեմ պայքարի խնդիրներն առավել քան արդիական են և հանդիսանում են միջազգային հանրության օրակարգի կարևոր բաղկացուցիչ: ՀՀ Գործողությունների ծրագրի մշակումը և արդյունավետ իրականացումը կարևորվում է գործուն ազգային մեխանիզմներ ստեղծելու և միջազգային փոխգործակցության տեսանկյունից:
