Հայաստանում ներդրումների պատրաստ եվրոպացի գործարարները սպասում են ՄՄ կանոնակարգի ու մաքսային ռեժիմի որոշակիացմանը: «Առաջին լրատվական»-ի հետ զրույցում այս մասին ասաց Հայ-բելգիական առևտրի պալատի նախագահ, տնտեսագետ Վալերի Սաֆարյանը՝ պարզաբանելով, թե ՄՄ-ին միանալու Հայաստանի որոշումը ինչ փոխեց եվրոպական գործարար հանրության տրամադրություններում և ծրագրերում:
Նա նշեց, որ դա մեծ անակնկալ էր եվրոպական գործարար հանրության համար, Հայաստանի և ԵՄ-ի քառամյա ինտենսիվ աշխատանքից հետո որևէ մեկը նման որոշում չէր սպասում: Ավելին. նրա խոսքով՝ բացի դրանից, ԽՀԱԱԳ-ն արդեն իսկ առաջ էր քաշված և պահանջարկ ուներ գործարար հանրության կողմից: Վալերի Սաֆարյանն ասաց, որ Բելգիայի առևտրի պալատի համար այդ որոշումն իսկապես հիասթափություն առաջացրեց, քանի որ իրենք մշտապես կարծում էին, որ ԽՀԱԱԳ-ն կխորացնի ԵՄ-Հայաստան տնտեսական համագործակցությունը, ինչի արդյունքում Հայաստանում հիմնական ներդրումներն ակնկալվում էին եվրոպացի գործընկերների կողմից:
«Բայց մենք նաև հասկանում ենք և վստահ ենք, որ Հայաստանը եղել է Ռուսաստանի կողմից մեծ ճնշման տակ, և Հայաստանի համար որոշ վճռական գործոններ կասկածի տակ էին առնվելու, ինչպիսիք են անվտանգությունն ու գազի գինը: Մենք հավատում ենք, որ առաջիկա շաբաթների ընթացքում Հայաստանը կկարողանա վերաձևավորել ԵՄ-ի հետ համագործակցության նոր շրջանակ, և պետք է ծրագրվեն նոր քայլեր: Համոզված եղեք, որ Հայ-բելգիական առևտրի պալատը, ինչպես Բրյուսելում գործող այլ կազմակերպություններ, կզբաղվեն նոր ռազմավարական ծրագրերի մշակման անհրաժեշտության լոբբինգով»,- նշեց Վալերի Սաֆարյանը:
Վերջինիս խոսքով՝ ներկայում եվրոպացի բիզնեսմենները սպասում են՝ տեսնելու, թե ինչ է լինելու ՄՄ կանոնակարգն ու մաքսային ռեժիմը, շատ հարցեր դեռևս պետք է որոշակիանան: Նա ասաց, որ վստահ են՝ Հայաստանը լիբերալ երկիր է և լինելով ԱՀԿ անդամ՝ ստիպված է լինելու մեծ դերակատարություն և ազդեցություն ունենալ ՄՄ քաղաքականության վրա:
«Մենք չենք կարծում, որ եվրոպական ընկերությունները ապագայում պատրաստ չեն լինի աշխատել Հայաստանի հետ, սակայն, բնականաբար, ԽՀԱԱԳ-ն կարող էր մեծ խթան հանդիսանալ այդ համագործակցության համար: Երբ ՄՄ-ն դառնա կենսունակ, մենք համոզված ենք՝ Հայաստանը կմեծացնի միջազգային գործարար հանրության դերն այս նոր շուկայում և նրանց հետ բիզնես անելու ելքեր կգտնի»,- նման հույս հայտնեց Վալերի Սաֆարյանը:
Ամփոփելով՝ նա նշեց, որ պետք է սպասել և տեսնել, թե մինչև Վիլնյուսի գագաթնաժողովը՝ ԵՄ-ն ու ՀՀ-ն ինչ կհամաձայնեցնեն: Նա տեղեկացրեց, որ հաջորդ տարի սպասվում են եվրոպական ընտրություններ, ուստի հանձնաժողովի նոր կազմը միգուցե տարածաշրջանի համար նոր տեսլականով և գաղափարներով գործի:
