Վրաստանի նախագահ Միխեիլ Սաակաշվիլին չորեքշաբթի ՄԱԿ-ի Գլխավոր ասամբլեայում ելույթի ժամանակ կանխատեսել է «ՊԱԿ-ի նախկին գործակալ Վլադիմիր Պուտինի հեռացումը» Կրեմլից, «Ռուսական կայսրության» փլուզումը, «Եվրասիական միություն» կոչվող նախագծի ձախողումը: Նա դատապարտել է «Ռուսաստանի կողմից վրացական հողերի բռնազավթումը», ներողություն է խնդրել Վրաստանի այն քաղաքացիներից, որոնց կյանքը չի կարողացել ավելի լավը դարձնել: Նրա ելույթի կեսից Ռուսաստանի պատվիրակությունը լքել է ՄԱԿ ԳԱ նիստերի դահլիճը՝ ի նշան բողոքի: Այս մասին հաղորդում է «Ամերիկայի ձայն» ռադիոկայանի ռուսական ծառայությունը:
«Մի քանի տարի հետո Վլադիմիր Պուտինը կհեռանա Կրեմլից, կանհետանա ռուսական քաղաքականությունից: Ռուսաստանի քաղաքացիները կհիշեն նրանց որպես հին ժամանակների, կոռուպցիայի և ճնշումների ժամանակների ուրվական»,- ասել է Վրաստանի նախագահը և հավելել, որ այդ ժամանակ Ռուսաստանը կդադարի լինել կայսրություն և կդառնա սովորական պետություն:
Սաակաշվիլին հայտարարել է, որ Ռուսաստանը շարունակում է բռնագրավել վրացական հողերը և դրանով իսկ թուլացնում է երկիրը: Նրա խոսքերով՝ Ռուսաստանի համար շահեկան չեն ուժեղ հետխորհրդային հանրապետությունները (Ուկրաինա, Մոլդովա, Հայաստան և Ադրբեջան):
«Կարծում եք՝ Պուտինը ցանկանում է, որ Հայաստանը գերակայությո՞ւն ստանա Ադրբեջանի հետ հակամարտությունում: Ո՛չ: Դա Հայաստանին կդարձներ չափազանց ուժեղ և պոտենցիալ չափազանց անկախ: Թե՞ կարծում եք, որ հակառակն է. որ Մոսկվան ցանակնում է՝ Բաքուն հաղթանակ տանի Երևանի նկատմամբ:»,- ասել է Սաակաշվիլին՝ նկատի ունենալով Լեռնային Ղարաբաղի հակամարտությունը, և հավելել, որ Մոսկվան չի ցանկանում, որ ինչ-որ մեկը հաղթի, քանի որ նրանց նպատակը հենց հակամարտությունն է, որը ժողովուրդներին խանգարում է դառնալ անկախ և արգելափակում է նրանց ինտեգրումը Եվրամիություն:
Սաակաշվիլին հայտարարել է, որ Վլադիմիր Պուտինը Եվրասիական միության գաղափարը ձևավորել է որպես այլընտրանք Եվրամիությանը, և նրա նոր նախագահության հիմնական նախագիծն է:
«Եվրասիական միությունը հիմնվում է սկզբունքների վրա, որոնք հակասում են Եվրամիության հիմնական սկզբունքներին: Այն սնվում է անհանդուրժողականությամբ, այն ղեկավարում են ՊԱԿ-ի նախկին գործակալներ, դրա նպատակն է՝ վերակենդանացնել նախկին կայսրությունը: Եվրասիական միությանն անդամակցելը հեշտ է՝ չկան սոցիալական, քաղաքական կամ տնտեսական չափանիշներ: Շատ հեշտ է գաղութ դառնալ: Միակ պահանջը պասիվությունը և չեզոքությունն է»,- ասել է Սաակաշվիլին:
Սաակաշվիլին նախազգուշացրել է, որ Վրաստանում և ԽՍՀՄ նախկին հանրապետություններում աշխատում են «Ռուսաստանի ձայներ», որոնք փորձում են սևացնել Եվրամիությունը և դրա արժեքները:
«Տարօրինակ է, որ վերջին տարիներին և ամիսներին, Թբիլիսիում, Կիևում և Քիշնևում մենք լսում ենք միևնույն այլանդակ երաժշտությունը, որի նվագավարը Մոսկվան է, մենք լսում ենք, որ մեր ավանդույթները ոչնչացվում են Արևմուտքի ճնշման տակ, որ քրիստոնեական տոները կփոխարինվեն գեյ-շքերթներով, որ եկեղեցիները կվերածվեն Դիսնեյլենդերի…»,- ասել է Սաակաշվիլին:
Նախագահն ընդգծել է, որ նախկին նվաճված ժողովուրդները պետք է միավորվեն իրենց ուժի հիման վրա:
«Միասնականությունը պետք է լինի մեր կանոնը Արևելյան Եվրոպայում, այդ թվում՝ Կովկասում»,- ընդգծել է նա:
