Այս օրերին հետաքրքիր իրավիճակ է ստեղծվել Հնդկաստանի մայրաքաղաքում: Դելիի փողոցներում սկսել են հայտնվել աշխարհի ամենահայտնի ավտոընկերությունների լքված թանկարժեք մեքենաները:
Տեղի ոստիկանությունն ու հարկային ծառայությունը ստիպված են հավաքել դրանք և տանել տուգանային հրապարակ: Ներկա պահին դրանց թիվն արդեն գերազանցում է 40-ը:
Բանն այն է, որ այդ մեքենաները Հնդկաստան են ներմուծվել, իսկ հետո «զեղչով» վաճառվել ապահովված քաղաքացիներին երկրի մի քանի բարձրաստիճան քրեականացված իշխանավորների կողմից, որոնք դիվանագիտական փաստաթղթերով և հարկային մարմիններին շրջանցելով՝ երկիր են ներմուծել հարյուրավոր գերթանկարժեք մեքենաներ:
Հնդկաստանի հարկային ծառայությունը կասկածում է, որ մի բրիտանացի գործարար և Հյուսիսային Կորեայի ու Վիետնամի դիվանագիտական կորպուսների ներկայացուցիչներ Հնդկաստանի մեքենաների սերվիսների միջոցով վերավաճառել են գողացված մեքենաները, որը թույլ է տվել դրանից ստանալ միլիոնավոր դոլարների շահույթ:
Ընդամենը 4-5 տարվա ընթացքում նրանք երկիր են ներմուծել մինչև 400 թանկարժեք, լյուքս դասի մեքենա: Այս մեքենաները վարում են հնդկաստանցի բարձրաստիճան պաշտոնյաները, Բոլիվուդի աստղերը, կրիկետի հանրահայտ խաղացողները և շատ գործարարներ: Սակայն հիմա նրանք ստիպված են ազատվել այդ մեքենաներից կամ էլ ապացուցել, որ իրենք օրինավոր քաղաքացիներ են: Իսկ դա ապացուցելը շատ դժվար է լինելու, քանի որ այդ բոլոր մեքենաները վաճառվել են իջեցված գներով:
Բանն այն է, որ Հնդկաստանում թանկարժեք մեքենաների պահանջարկը շատ մեծ է, սակայն մաքսազերծման տոկոսադրույքը կազմում է 100%: Այդ իսկ պատճառով զեղծարարները Մեծ Բրիտանիայից, Ֆրանսիայից, Սինգապուրից և Ճապոնիայից մեքենաներ են գողանում, իսկ հետո դիվանագիտական խողովակներով ներմուծում դրանք երկիր՝ դրանով իսկ խուսափելով հարկեր վճարելուց:
Ինչպես հայտնում է The Telegraph-ը, այն բանից հետո, երբ հարկային ծառայությունը հայտնաբերել է այս անօրինականությունը, մեքենաների գնորդները, հարկային խնդիրներից խուսափելու համար սկսեցին իրենց մեքենաները թողնել փողոցներում: Դրանց մեջ կան Porsche Panamera (այն Հնդկաստանում արժե մոտավորապես 400 հազար դոլար), Bentley Continental Supersport (550 հազար դոլար), մի քանի հատ Aston Martin Rapide (մոտավորապես 450 հազար դոլար), մի քանի Maserati (280 հազար դոլար), Rolls-Royce, Ferrari, Hummer, Lamborghini և այլ թանկարժեք մեքենաներ:
