Այսօր Ավան և Նոր Նորք վարչական շրջանների ընդհանուր իրավասության դատարանում 16 մեղադրյալի վերաբերյալ ՊՊԾ գնդի գրավման գործով դատական նիստում փաստաբանները միաձայն ինքնաբացարկի միջնորդություն ներկայացրին նիստը նախագահող դատավոր Արտուշ Գաբրիելյանին:
Երեք ամբաստանյալի պաշտպան, փաստաբան Ինեսսա Պետրոսյանը հայտարարեց, որ դատավորը պաշտպանական իրավունքի բազում խախտումներ է թույլ տվել։
«Դուք նույնիսկ չնկատեցիք, որ դատարանի դահլիճում չէ Գագիկ Եղիազարյանը և նրա փաստաբանը, կարծես, ձեզ համար միևնույնն է, թե ովքեր են նստած դահլիճում: Ակնհայտ է, որ դուք քրեական դատավարությունը փակել մի կողմ եք դրել և ինչ-ինչ պատճառներով փորձում եք շարունակել ու արագացնել այս գործի դատավարությունը», – հայտարարեց փաստաբան Ինեսսա Պետրոսյանը:
«Մենք ցավում ենք Հայաստանի համար, որ դատավոր Գաբրիելյանի հարցը վաղը մյուս օրը քննարկվելու է Եվրոպական դատարանում», – իր հերթին հայտարարեց փաստաբան Հարություն Բաղդասարյանը:
Մեղադրող դատախազները առարկեցին ներկայացված միջնորդությանը՝ անվանելով այն անհիմն:
Դատավոր Արտուշ Գաբրիելյանը հեռացավ խորհրդակցական սենյակ՝ միջնորդության վերաբերյալ որոշում կայացնելու։ Որոշումը կհրապարակվի կես ժամ անց:
Լուսանկարը՝ Photolure-ի
