ԱԺ նախկին պատգամավոր, գործարար Հակոբ Հակոբյանը (Ճոյտ) ԱԺ ընտրություններում «Ծառուկյան» դաշինքի ցուցակով չընտրվելուց հետո կրկին սկսել է կինեմատոգրաֆիայով զբաղվել: Այս օրերին մեկնարկելու են Հակոբյանի հեղինակած հայ-ադրբեջանական հարաբերությունների մասին պատմող «Մենք հարևաններ ենք» ֆիլմի նկարահանումները: Ֆիլմի սցենարի հեղինակը Հակոբյանն է: Վերջինս մեզ հետ զրույցում ասաց, որ իր ֆիլմը խաղաղություն է քարոզում, թշնամի հարևաններին քարոզում է քաղաքականությունը մի կողմ թողնել և ապրել խաղաղ, կողք կողքի, հարևանների պես, առանց թշնամանքի: «Ֆիլմը խաղաղություն է քարոզում: Ագրեսիա, թշնամանք և նման այլ բաներ չկան: Ես խաղաղության կողմնակից եմ: Գտնում եմ, որ խնդիրը խաղաղ ճանապարհով պետք է լուծվի, ոչ թե զենքի: Մեր ֆիլմը երկու ընտանիքի մասին է: Ֆիլմի դեպքերը սկսում են 1988 թվականնից, երբ հայ ու թուրք ընտանիքն ապրում է Հայաստանում: Հետո գործողությունները զարգանում են մինչը 2016 թվականի ապրիլ»,- «Առաջին լրատվական»-ի հետ զրույցում ասաց Հակոբյանը՝ հավելելով, որ հիմա տարբեր ռեժիսորներ ֆիլմի վրա են աշխատում՝ փորձելով լավագույնս սցենարը դարձնել կինո:
Ֆիլմի նկարահանման աշխատանքները հիմնականում կատարվելու են Հայանիստ գյուղում:
Հակոբյանն ասաց, որ ոչ մեկի հետ չեն քննարկել ֆիլմի գաղափարը, սցենարը, մշակույթի նախարարությանն էլ տեղյակ չեն պահել: «Գաղափարը մերն է, մենք էլ որևէ վատ բան չենք անում: Արժեք ենք ստեղծում, որը խաղաղություն է քարոզում: Չեմ կարծում, որ դա պետք է քննադատության առիթ հանդիսանա: Մենք ուզում ենք նկարենք մի բան, մեր սերունդներին արժեք թողնենք, աշխարհին ցույց տանք, որ մենք ագրեսիա չենք քարոզում, որ մենք խաղաղության կողմանկից ենք»,-նկատեց Հակոբյանը:
Հակոբ Հակոբյանից հետաքրքրվեցինք՝ նորից գեղարվեստական աշխատանքի անցնելը նշանակո՞ւմ է, որ վերջնականապես հույսը կտրեց և հիասթափվեց քաղաքականությունից: «Ես ավելի ակտիվ քաղաքական գործիչ եմ, քան ԱԺ-ում նստած շատ պատգամավորներ: Քանի որ այն խնդիրները, որոնք ես իմ ֆիլմերում բարձրացնում եմ՝ հայ-թուրքական հարաբերություններ, խաղաղություն և այլ հարցեր, դրանք շատ ավելի լուրջ աշխատանք են, քան ԱԺ-ում նստած շատերի աշխատանքը: Քաղաքական գործիչը հասարակության առաջ պետք է հանսես գա, հաշվետու լինի: Սա է իմ հաշվետու լինելու ձևը»,- ասաց Հակոբյանը:
