Վերջին օրերին հակառակորդը երբեմն-երբեմն կրակ է բացում Տավուշի մարզի սահմանամերձ համայնքների ուղղությամբ, որտեղ այս օրերին հունձքի շրջան է, և գյուղացիները աշխատում են հիմնականում դաշտերում:
Կոթի համայնքի բնակիչները «Առաջին լրատվական»-ի հետ զրույցում ասացին, որ կրակոցները երեկ են հնչել, որից, բարեբախտաբար, ոչ ոք չի տուժել, և մարդիկ ինչպես երեկ, այնպես էլ այսօր ու հետո շարունակելու են իրենց աշխատանքները դաշտերում: «Սա է մեր կյանքը. մի օր կրակում են, մի օր չեն կրակում: Բա ի՞նչ անենք, էստեղ ենք ապրում, պիտի հարմարվենք: Թշնամու գյուլլի տակ ապրում ու աշխատում ենք: Կրակոցներն էլ մեզ համար արդեն սովորական են դարձել: Մի հատ կրակում են՝ բոլոր տեղերից վախեցած զանգում են, հետարքրքվում են՝ հարցնում են՝ կրակե՞լ են: Բայց մեր ծիծաղն էլ գալիս է դրա վրա: Ախր, մեզ մոտ ամեն օր են կրակում: Ցավալի է, բայց դա մեր առօրյա կյանքն է: Կամ պետ է թողենք-գնանք, կամ էսպես վախով ապրենք: Մենք էլ մնացել ենք, նախընտրել ենք գյուղում մնալն ու ապրելը»,- մեզ հետ զրույցում ասաց կոթեցիներից մեկը:
Կոթիի համայնքապետ Ֆելիքս Մելիքյանը «Առաջին լրատվական»-ի հետ զրույցում ասաց, որ այսօր հանգիստ է: Կիրակի օրն է մոտ 30 րոպե ակտիվ կրակահերթ եղել դաշտում աշխատող գյուղտեխնիկայի ուղղությամբ, սակայն կրակոցների ավարտից հետո գյուղացիները շարունակել են իրենց աշխատանքը:
Մեր դիտարկմանը, թե որևէ մեխանիզմ կա՞, կամ պատկերացնո՞ւմ է, որի ներդրման պարագայում գոնե այս սեզոնին հնարավոր կլինի գյուղացիներին պաշտպանել հակառակորդի կրակոցներից, Մելիքյանը պատասխանեց. «Միակ մեխանիզմը Ղարաբաղյան խնդրի վերջնական կարգավարումն է: Այլ տարբերակ կամ մեխանիզմ չկա: Քանի դեռ խնդիրը չի կարգավորվել, մեզ այս առօրյան է սպասում»:
Հարակից Ոսկևան համայնքի ղեկավար Սերյոժա Ալեքսանյանը մեզ հետ զրույցում ասաց, որ կրակոցների անորոշ ձայներ լսում են, բայց դրանք վտանգ չեն ներկայացնում գյուղացիների համար, քանի որ իրենց խոտհնձի դաշտերը կրակի տակ չեն, այլ ուղղությամբ են: «Խոտհնձի ժամանակ վտանգ չկա, սակայն արդեն ցորենի հունձքի ժամանակ խնդիր կառաջանա, քանի որ այդ դաշտերը թշնամու կրակի տակ են, և կրակոցներ հաճախ լսվում են: Բայց դա ամենօրյա բան է»,- ասաց Ալեքսանյանը:
Բարեկամավան համայնքի նախկին ղեկավար Գագիկ Աբազյանն էլ մեզ հետ զրույցում ասաց, որ համայնքում հանգիստ է, կրակոցներ չկան: Իսկ գյուղացիների, գյուղի ուղղությամբ կրակոց վերջին անգամ մի քանի ամիս առաջ է եղել: «Առհասարակ, դիքերում կրակոցներ հնչում են, դրանք լսելի են գյուղում, բայց դա մեզ համար սովորոկան բան է, արտառոց ոչինչ չկա»,- ասաց Աբազյանը:
