Ըստ հավաստի տեղեկությունների՝ Արագածոտնի մարզպետարանում խոշոր յուրացումներ են կատարվել: Յուրացվել են, օրինակ, մարզի դպրոցներին հատկացված գումարները, ինչը տևական բնույթ է կրել: Յուրացումների հարցն այնքան ծայրահեղ է եղել, որ դա քննարկել են ՀՀԿ-ականները ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովում, սակայն հանձնաժողովի անդամ ՀՀԿ-ական Կարինե Աճեմյանն ասաց, որ չարաշահումների մասին տեղյակ է այնքանով, որքանով կարդացել է մամուլում: Իրենց հանձնաժողովն էլ «չարաշահումների հարցերով չի զբաղվում», այլ օրենսդիր գործունեությամբ:
«Ես այլ ինֆորմացիա չունեմ, պարզապես այս օրերին կարդացել եմ մամուլում, թեման շոշոփվում է: Երևի դա պետք է իրավապահները ճշտեն, ոչ թե մենք: Իհարկե, դպրոցների վերաբերյալ բոլոր չարաշահումների դեպքերը ես շատ ծանր եմ տանում, որովհետև կարծում եմ, որ մենք պետք է ամեն ինչ անենք, որ դրանք կանխենք»,- ասաց տիկին Աճեմյանը:
Նկատենք, սակայն, որ Արագածոտնի մարզպետարանում կատարված չարաշահումների մասին մամուլում դեռևս հրապարակում չկա, թե տիկին Աճեմյանը որտեղ է կարդացել՝ պարզ չէ:
Նշենք, որ Արագածոտնի մարզում կատարված չարաշահումներն արձանագրել էր նաև ֆինանսների նախարարությունը`անցած տարի իրականացրած ստուգումների արդյունքում: Մարզպետարանում, մի շարք համայնքներում և մարզային ենթակայության առողջապահական հիմնարկներում կատարված ստուգումների արդյունքում հայտնաբերվել էին 18.5 մլն դրամի հավելագրումներ դպրոցների գծով, 5.1 մլն դրամ` նպաստների գծով: Հայտնաբերվել էր նաև, որ ծառայողական 3 ավտոմեքենաների վրա տեղադրվել են գազաբալոններ, սակայն բյուջեից գումար է հատկացվել բենզին գնելու համար: Այս մասին հայտնի էր դարձել դեռևս այս տարվա մասիսին:
Արագածոտնի մարզպետ Սարգիս Սահակյանից փորձեցինք պարզել՝ վերականգնե՞լ են պետությանը պատճառված վնասը, և ի՞նչ նոր չարաշահումների մասին է խոսքը: Մարզպետը, սակայն, մեզ հետ զրույցում ասաց, որ այսպիսի բան չկա, առաջին անգամ է լսում. «Էդպիսի խոսակցություններ չկան, առաջին անգամ ձեզանից եմ լսում: Իհարկե, ոչ մի խնդիր չի կարող լինել»:
Մեր հարցին, թե մարզի համայնքներին հատկացված գումարները բաշխվե՞լ են ամբողջությամբ, մարզպետն ինքնագոհ ծիծաղով արձագանքեց. «Տո, մենք ի՞նչ իրավունք ունենք պահենք. կառավարության որոշում կա, կառավարության որոշումով գնում-նստում ա իրանց հաշիներին, մենք ո՞նց կարանք պահենք»: Երբ հիշեցրինք նախարարության ստուգումների արդյունքները, մարզպետը հակադարձեց, թե ֆինանսների նախարարությունը երեք տարին մեկ է ստուգումներ իրականացնում: Վերջին անգամ էլ 2 տարի առաջ են մարզպետարանում ստուգումներ եղել, բայց թե ինչ է հայտնաբերվել այդ ստուգումների արդյունքում՝ մարզպետը չհիշեց: «Հիմա չեմ հիշում, 2011 թվականին էր, բայց ասում եմ՝ չկա նման բան, պինդ մնացեք»,- ասաց ու հրաժեշտ տվեց:
