ԱՄՆ նախագահ Դոնալդ Թրամփը հայտարարել է, որ եկել է Ռուսաստանի հետ կառուցողական աշխատանքում առաջ շարժվելու ժամանակը։ Այս մասին նա գրել է իր թվիթերյան էջում։ Թրամփը նշել է, որ ձեռք է բերվել պայմանավորվածություն Սիրիայի որոշ շրջաններում հրադադարի ռեժիմի մասին։
«Մենք պայմանավորվել ենք Սիրիայի որոշ հատվածներում կրակի դադարեցման մասին, ինչը կյանքեր կփրկի։ Այժմ եկել է Ռուսաստանի հետ կառուցողական աշխատանքում առաջ շարժվելու ժամանակը»,-գրել է նա։
Բացի այդ, Թրամփը հայտնել է, որ ինքն ու Պուտինը քննարկել են կիբերանվտանգության ստորաբաժանում ստեղծելու հարցը։
Թրամփը նշել է, որ հակառուսական պատժամիջոցները չեն վերացվի, քանի դեռ չեն լուծվել Ուկրաինայի և Սիրիայի խնդիրները։
«Պատժամիջոցները չեն քննարկվել նախագահ Պուտինի հետ իմ հանդիպմանը։ Ոչինչ չի արվի, քանի դեռ չեն լուծվել Ուկրաինայի և Սիրիայի խնդիրները»,-գրել է ԱՄՆ նախագահը։
Ավելի վաղ ԱՄՆ պետքարտուղար Ռեքս Թիլերսոնը հայտարարել էր, որ ԱՄՆ-ի և ԵՄ-ի հակառուսական պատժամիջոցները չեն չեղարկվի մինչ Ուկրաինայում հակամարտության կարգավորումը։
