Հայաստանում կա մեկ քաղաքական որոշում՝ Սերժ Սարգսյանի որոշումն է: Այսօր լրագրողների հետ հանդիպմանը նշեց «Ժառանգություն» կուսակցության փոխնախագահ Արմեն Մարտիրոսյանը՝ նկատի ունենալով Սերժ Սարգսյանի՝ ՄՄ անդամակցության մասին սեպտեմբերի 3-ի հայտարարությունը:
Հայաստանում, ըստ նրա, միայն այն պատճառով, որ մենք այս տարիներին չունեցանք օրինական ընտրված իշխանություն, մենք կորուստներ ունեցանք, և աջակցություն ձեռք բերելով արտաքին աշխարհից՝ Հայաստանից ինչ-որ բաներ պետք է տայինք աջակիցներին:
Նա ասաց, որ այս տարիներին ոչ միայն իշխանությունը, այլ նաև ընդդիմադիրները մեղք ունեին, սակայն իշխանությունը, ի տարբերություն ընդդիմության, ունի լծակներ, ոստիկանության, բանակի մահակներ: Արմեն Մարտիրոսյանը նշեց, որ վերջին տարիներին տեսել ենք, որ իշխանության վերարատդրության վերջին հույսը մնացել է ոստիկանությունը և բանակը:
«Ես երբևէ չեմ կարող արդարացնել ընդդիմության թերությունները իշխանության մեղքերի հետ»,- ասաց նա:
Նա նշեց, որ իշխանության ներսում բարեփոխում այլևս հնարավոր չէ, և այսուհետ ինչ էլ անենք Հայաստանում, հեղափոխություն է լինելու:
«Ժառանգություն» կուսակցության փոխնախագահն ասաց, որ հասարակության մոտ կա հիասթափության տարր, ինչը արտահայտվում է սեփական դաշտում արտագաղթի միջոցով լուծումներ գտնելով: Նա ասաց, որ իր ընտանիքի անդամների մեջ էլ կա հիասթափություն, բայց մյուս կողմից էլ, ըստ բանախոսի, հասարակության մեջ չկա մեկը, որի բողոքավոր չլինի: Դժգոհությունը համատարած է, փոփոխությունը հեղափոխություն է լինելու:
