Միացյալ Նահանգները կարող է իսկապես հետաքրքրված լինել՝ ներդրումներ անելու Հայաստանի էներգետիկայի ոլորտում՝ ելնելով թե՛ կոմերցիոն և թե՛ աշխարհաքաղաքական նկատառումներից, «Առաջին լրատվական»-ի հետ զրույցում ասել է ամերիկյան «Սթրաթֆոր» (Stratfor) հետախուզական-վերլուծական կենտրոնի Եվրասիա բաժնի վերլուծաբան Եվգենի Չաուսովսկին՝ մեկնաբանելով Հայաստանում ԱՄՆ արտակարգ և լիազոր դեսպան Ռիչարդ Միլսի հայտնի հայտարարությունը՝ ամերիկյան ընկերությունների կողմից Հայաստանի վերականգնվող էներգետիկայի բնագավառում հնարավոր ներդրումների մասին:
«Միացյալ Նահանգներն ընդհանուր առմամբ աջակցում է նախկին խորհրդային երկրների ջանքերին՝ ուղղված էներգետիկայի դիվերսիֆիկացմանը, և սա վերաբերում է մասնավորապես այն երկրներին, որոնք մեծապես կախված են Ռուսաստանից, օրինակ՝ Հայաստանին: Հետևաբար, դեսպանի մեկնաբանությունները մեծապես տեղավորվում են Միացյալ Նահանգների քաղաքականության և ռազմավարական շահերի շրջանակներում»,- նշել է վերլուծաբան Եվգենի Չաուսովսկին: