«Սասնա ծռեր» խմբի 18 անդամի գործով նիստին այսօր ներկայացել են երեք ամբաստանյալներ, ինչի հետ կապված խմբի անդամ Մարտիրոս Հակոբյանի (Դեդ) պաշտպան Լուսինե Սահակյանը դատավորից պահանջեց ապահովել բոլոր 15 անդամի ներկայությունը: Այս պահանջին ի պատասխան՝ նախագահող դատավոր Արտուշ Գաբրիելյանն ասաց. «6 ժամով դատական սանկցիա է կիրառվել, ի՞նչ ապահովելու մասին է խոսքը»:
Լուսինե Սահակյանը ասաց, որ միջնորդություն է ներկայացնում իրենց պաշտպանյալներին անհապաղ ազատ արձակելու վերաբերյալ։ Դատավորն ընդհատեց նրան՝ նշելով. «Ձեր միջնորդությունը կանեք միջնորդությունների փուլում, ձայնի իրավունք չեմ տալիս»: Պաշտպան Լուսինե Սահակյանը նշեց, որ օրենսգրքում միջնորդությունների փուլ հասկացություն գոյություն չունի, որից հետո ինքնաբացարկի միջնորդություն ներկայացրեց դատավոր Արտուշ Գաբրիելյանին:
«Մի դատավոր, որը թույլ է տալիս նման կոպիտ խախտումներ, իրավունք չունի դատական գործ վարելու եւ իրավունք չունի դատավոր լինելու: Այլ հիմքեր էլ կան ձեզ ինքնաբացարկ հայտնելու: Մասնավորապես այն, որ փորձում եք լռեցնել փաստաբաններին, թույլ չեք տալիս հայտարարություններ և միջնորդություններ անել, ավելին, դուք այն դատավորն եք, որի նախագահությամբ քննվող գործի շրջանակներում բռնություն է կիրառվել «Սասնա ծռեր» խմբի անդամների նկատմամբ: Դուք հիմա կոնվենցիայի քանի՞ հոդվածի խախտում թույլ տվեցիք։ Սա այն գործը չէ, որ դուք պետք է քննեք»,- ասաց Լուսինե Սահակյանը:
Միջնորդությանը միացավ նաև փաստաբան Գրիշա Բալասանյանը:
