Սփյուռքահայ գործարար, «Արին կապիտալ» ընկերության սեփականատեր Էդմոն Խուդյանի վերաբերյալ դատական գործի քննությունը տեղում դոփում է: 7 ամիս է՝ այս գործով դատական նիստեր են նշանակված, բայց դրանց մի մասը կամ չի կայանում, իսկ կայացած նիստերի ժամանակ ընդամենը գործի հատորներն են ուսումնասիրվում: Գործի քննությունը, որպես այդպիսին, չի մեկնարկել, թեև արդեն 7 ամիս է՝ գործը վարույթ է ընդունվել դատարանի կողմից:
Էդմոն Խուդյանի շահերի ներկայացուցիչ, փաստաբան Լեռնիկ Հովհաննիսյանը «Առաջին լրատվական»-ի հետ զրույցում ասաց, որ ստեղծված իրավիճակը միանգամայն հիշեցնում է այս գործով նախաքննության պրոցեսը. երբ քրեական գործ էր հարուցվել և մի քանի տարի քննություն էր գնում: Նախաքննության ժամանակ ևս գործը տեղում դոփում էր: Արդյունքում, ըստ մեղադրանքի, Խուդյանի «Արին կապիտալ»-ը թալանած Վլադիսլավ Մանգասարայնը հայտնվեց ազատության մեջ և առ այսօր էլ վայելում է իր ազատությունը՝ այն դեպքում, երբ անցնում է ծանր քրեական գործով և առանցքային մեղադրյալն է:
Հիշեցնենք, որ Խուդյանի «Արին կապիտալ» ընկերությունը կանխամտածված սնանկացման հասցնելու մեջ մեղադրվող Մանգասարյանը 1 տարի կալանքի տակ մնալուց հետո 2014 թվականին ազատ արձակվեց: Նրա նկատմամբ կալանավորումը փոխարինվեց ստորագրությամբ չհեռանալ մասին խափանման միջոցով: Ըստ օրենքի՝ գործի քննության 1 տարին լրանալուց հետո կա՛մ պետք է նախաքննության ավարտ հայտարարվի, կա՛մ մեղադրյալն ազատ արձակվի: Եվ քանի որ նախաքննությունը չէր ավարտվել, Մանգասարյանն ազատ արձակվեց: Սակայն երբ գործը գնաց դատարան, դատավորը ևս իրավունք ուներ խափանման միջոց կիրառել: Սակայն դատավորն էլ Մանգասարյանին ազատություն շնորհեց և իր այս ձգձգվող դատավարությամբ էլ ավելի է երկարաձգում Մանգասարյանի ազատությունը:
«Մանգասարյանն ազատության մեջ է, անմեղության կանխավարկածը գործում է: Այսինքն՝ մենք ունենք մի իրավիճակ, երբ 2010 թվականին կատարվել է գործողություն, որը նախաքննությունը որակել է որպես հանցագործություն: Բայց 2017 թվականին էլ որևէ շոշափելի արդյունք չկա: Անմեղության կանխավարկածը հաշվի առնելով՝ Վլադիսլավ Մանգասարյանն անմեղ մարդ է»,- ասաց Հովհաննիսյնաը:
Լեռնիկ Հովհաննիսյանի խոսքով՝ դատական պրոցեսի ձգձգման պաշտոնական պատճառաբանությունն այն է, որ գործով դատավոր Արմեն Բեկթաշյանը մեկ այլ գործով գտնվում է խորհրդակցական սենյակում: «Պաշտոնական պատճառը սա է, բայց թե այլ միտումներ կան, թե ոչ՝ չեմ կարող ասել: Ամեն դեպքում, ինձ թվում է, ձգձգման պատճառը դատավորի հետ չի կապված: Նա բավականին համարձակ դատավոր է, անկաշկանդ է, և չեմ կարծում՝ Մանգասարյանին հովանավորելու համար նա կգնար այդ քայլին»,- ասաց փաստաբանը:
Էդմոն Խուդյանը, սակայն, «Առաջին լրատվական»-ի հետ զրույցում ասաց, որ իր կարծիքով՝ գործի դատաքննությունը դիտավորյալ է ձգձգվում, քանի որ չկա Մանգասարյանին պատասխանատվության ենթարկելու ցանկություն: «Նախկինում իմ գործերով դատական նիստերը ամենայն արագությամբ էին տեղի ունենում՝ Մանգասարյանին հանձնելով ընկերությունը թալանելու հիանալի հնարավորություն, իսկ հիմա, երբ պետք է Մանգասարյանին դատեն, արդեն դատ էլ տեղի չի ունենում: Տուժողները ԱՄՆ-ից, Իրանից ու Մոսկվաից գալիս հասնում են Հայաստան ու դատի օրն են իմանում, որ դատ չի լինելու… Սա դատարանի սովորական զբաղվածության հարց չէ»,- ասաց Խուդյանը:
