«Առաջին լրատվական»-ի զրուցակիցն է ԴԱՀԿ նախկին պետ, ԱԺ ՀՀԿ խմբակցության պատգամավոր Միհրան Պողոսյանը:
– Պարոն Պողոսյան, մինչ խորհրդարանական ընտրությունները վարչապետ Կարեն Կարապետյանը հայտարարեց, որ Ձեզ գործադիրում չի տեսնում: Իսկ Դուք 2018-ից հետո Կարեն Կարապետյանին կառավարության ղեկին տեսնո՞ւմ եք, թե՞ ոչ:
– 2018 թվականը դեռ կգա, և ժամանակ կա հասկանալու, թե 2018-ի այդ օրվա պահանջները ինչպիսին կլինեն: Այսօր 2017 թվականի հունիս ամիսն է: Այսօր մենք ունենք շատ անելիքներ, և թողնենք այսօրվա մեր խնդիրները, անելիքները և մտածենք, թե 2018-ին ի՞նչ է լինելու… օրը կգա, և իրավիճակից կհասկանանք՝ ինչ է պետք: Վերջիվերջո, գոյություն ունի կուսակցություն, կուսակցության որոշում, և մենք առաջին հերթին առաջնորդվում ենք կուսակցության որոշումով:
– Այսինքն՝ եթե կուսակցությունը վարչապետ տեսնի Սերժ Սարգսյանին, իսկ փոխվարչապետ՝ Կարեն Կարապետյանին, Ձեզ համար ընդունելի՞ է:
– Ես կարծում եմ, որ կուսակցությունը գնահատական կտա այդ ժամանակ:
– Երեկ կառավարության նիստը վարում էր Սերժ Սարգսյանը և կրկին շեշտեց, որ աջակցում, սատարում է Կարեն Կարապետյանին: Ինչո՞ւ է անընդհատ շեշտում այդ աջակցության մասին: Այդ աջակցության կարիքն ունի՞ Կարեն Կարապետյանը:
– Միգուցե լրատվամիջոցների դաշտում և հասարակության մեջ առաջացել է դրա կարիքը: Եթե նախագահը շեշտում է, ուրեմն տեսել է դրա կարիքը:
– Սերժ Սարգսյանից լրագրողները հետաքրքրվել են, թե արդյոք ի՞նքն է լինելու 2018 թվականից հետո վարչապետ, ի պատասխան՝ Սերժ Սարգսյանն ասել է. «Չէիք լսո՞ւմ վերևում: Նոր դրա վերաբերյալ խոսել եմ»: Դուք այդ ելույթում այս հարցի պատասխանը ստացե՞լ եք:
– Ես նոր տվեցի պատասխանը, և սա միայն իմ դիրքորոշումը չէ, սա կուսակցության և կուսակցության ղեկավարի դիրքորոշումն է:
– Այդ դեպքում ինչո՞ւ կա ինտրիգ:
– Երևի ժողովուրդը սիրում է ինտրիգ, իսկ լրագրողները աջակցում են դրան:
– Բայց կարծես թե իշխանությունն է անընդհատ ինտրիգների մեջ:
– Ես կարծում եմ՝ լրագրողներն աջակցում են ինտրիգներին: Ինտրիգային դաշտը Հայաստանում շատ ավելի է, քան անհրաժեշտ է: Եվ այդ ինտրիգային դաշտը խանգարում է մեր տնտեսության բնականոն զարգացմանը, մեր առօրյա գործառույթներին:
– Կարեն Կարապետյան-Միհրան Պողոսյան հարաբերությունները արդյոք նորմա՞լ են՝ հաշվի առնելով «Քեթրին գրուպում» հարկային ստուգումները:
– Իսկ ի՞նչ կապ ունի «Քեթրին գրուպը» Միհրան Պողոսյանի հետ: Ես կարող եմ այս հարցին մեկ նախադասությամբ պատասխանել՝ Կարեն Կարապետյան վարչապետը և Միհրան Պողոսյան ԱԺ պատգամավորը նորմալ հարաբերությունների մեջ են:
– Ոչ ավելի՞ն:
– Ոչ: Որպես ԱԺ պատգամավոր և վարչապետ:
– Կոռուպցիայի կանխարգելման այս նոր հանձնաժողովի ստեղծումը ի՞նչ նպատակ է հետապնդում, մի՞թե իսկապես ուզում են կոռուպցիայի դեմ պայքարել, թե՞ ուղղակի աչքկապոցի է:
– Ես կարծում եմ, որ իսկապես ուզում ենք կոռուպցիայի դեմ պայքարել, և դա շատ արդիական և ճիշտ է:
– Արդյունքում մի քանի դատավոր կպատժվեն և վերջ, ինչպես այս օրերին ականատես եղանք:
– Կպատժվեն այն բոլոր մարդիկ, ովքեր կատարել են համապատասխան իրավախախտումներ:
– Կարծում եք՝ խոշոր «ձկներին», չինովնիկներին բռնելու ժամանա՞կն է, եթե կոռուպցիոն ռիսկեր կան:
– Ես կարծում եմ՝ միշտ է ժամանակը, ոչ թե արդեն: Եվ ցանկացած չնովնիկ եթե կոռումպացված է, աշխատում է այդ դաշտում, հենց իր կոլեգան պետք է իր ձեռքը բռնի. մենք այսօր ավելի քան կարիք ունենք ցույց տալու ժողովրդին և այնպես անելու, որ մեր ժողովուրդը լավ ապրի:
– Երեկ հրապարակվեց այն պաշտոնյաների որդիների ցանկը, ովքեր խուսափել են բանակում ծառայությունից: Ձեր գնահատականը:
– Համապատասխան գնահատական է պետք տալ ցանկացած խնդրի: Իմ գնահատականը հետևյալն է՝ եթե երեխան առողջ է, պետք է ծառայի՝ անկախ նրանից, թե ում երեխան է:
– Չե՞ք կարծում, որ նրանք բոլորն էլ առողջ են:
– Չեմ կարող ասել, չեմ կարող գնահատական տալ: Որպես ՀՀ քաղաքացի՝ իմ մոտեցումն ասացի:
– Պաշտոնյան առաջին հերթի՞ն չպետք է ուղարկի իր որդուն բանակ՝ դրանով նաև հանրության համար օրինակ ծառայի:
– Բոլորը պետք է ուղարկեն իրենց երեխաներին ծառայության, անկախ նրանից՝ պաշտոնյա է, թե բանվոր: Ով ուզում է լինի, երեխան պետք է իր պարտքը տա ազգին, եթե, իհարկե, առողջական խնդիր չունի: Եթե առողջական խնդիր ունի, դա այլ հարց է:
– ԱԺ-ում ինչպե՞ս եք Ձեզ զգում, ավելի լա՞վ, քան երբ ԴԱՀԿ պետ էիք:
– Ես պաշտոնով կամ լիազորությունների շրջանակով չէ, որ ինձ լավ եմ զգում, ես իմ տեղը գտնում եմ շատ արագ՝ ցանկացած ոլորտում և կարգավիճակում, և նաև տեսնում եմ իմ անելիքները, և ես այսօր տեսնում եմ իմ անելիքները այստեղ:
– Նախընտրական քարոզարշավի ժամանակ մեզ հետ զրույցում նշեցիք, որ օրենսդրական նախաձեռնություններով եք հանդես գալու: Ի՞նչ եք արել այս ընթացքում:
– Պատրաստվում ենք և աշնանը մեր նախաձեռնությունները միանգամից կներկայացնենք:
– Հայաստանում թավշյա հեղափոխության կոչեր են հնչում: Հնարավո՞ր է այս գործընթացն արագանա, եթե իշխանությունը քայլ չանի փոխվելու:
– Ընդհանրապես հեղափոխություններին դեմ եմ և կարծում եմ, որ ոչ մի հեղափոխություն ոչ մի լավ բանի չի բերել: Համենայնդեպս, պատմությունը դա է ցույց տալիս: Եվ հեղափոխական կեցվածքը պետք է փոխվի աշխատանքային կեցվածքով, պետք է լավին լավ ասել և վատին՝ վատ: Պետք է տեսնել աշխատողին՝ լինի իշխանական, թե ոչ իշխանական թևերից, պետք է լավին լավ մոտենալ և վատին վատ մոտենալ: Բոլորն էլ կարող են սխալներ անել: Եվ նույն իշխանավորը պետք է կարող լինի ընդունելու իր կատարած սխալը: Եվ եթե բարձրաձայնվում է հարց, որը ի նպաստ հասարակության է, պետք չէ քննարկել, թե այդ հարցն ով է բարձրացրել: Պետք է վերցնել խնդիրը և առաջ տանել՝ անկախ այն հանգամանքից, թե որ թևից են այդ հարցը բարձրացրել: Իսկ հեղափոխությանը ինքս դեմ եմ, հեղափոխական ոճը ոչ մի լավ բանի չի բերում:
– Հայաստանում կա բևեռացված վիճակ՝ շատ հարուստներ և շատ աղքատներ: Այս անարդարության ֆոնին չե՞ք կարծում, որ կարող են նման գործընթացները շատ արագանալ:
– Կարծում եմ՝ այսօրվա կառավարությունը աշխատանքներ է տանում միջին խավ ձևավորելու: Եվ պետության տնտեսության ուժը միջին խավի առկայությունն է:
– Մեկ ներդրում չկա Սփյուռքից, թեև, օրինակ, Հայաստանի ներդրողների ակումբ բացվեց հենց այդ նպատակով:
– Պետք չէ նստել և սպասել, որ Սփյուռքից ներդրողներ գան: Մենք ունենք լրջագույն խնդիր, սպասում ենք, որ ինչ-որ մեկը գա մեր տեղը աշխատի: Ես ուզում եմ մի բան մենք հասկանանք՝ մենք մեր խնդիրների տերը պետք է լինենք, մենք մեր խնդիրները պետք է լուծենք: ՀՀ քաղաքացին պետք է այդ խնդիրների տերը և լուծողը լինի, և չպետք է նստել սպասել Սփյուռքին: Շատ լավ է, որ գան, ներդրումներ անեն, ներդրումները պոզիտիվ են, արագ կարող են տնտեսության աճին զարկ տալ, բայց չպետք է նստենք սպասենք, որ ներդրողներ գան դրսից. մենք ինքներս դա կարող ենք անել:
Լուսանկարը՝ Photolure-ի
