Ռուսաստանի ԱՊՀ երկրների ինստիտուտի փոխտնօրեն, ռազմական փորձագետ Վլադիմիր Եվսեևը կտրականապես դեմ է Ադրբեջանին ռուսական զենք մատակարարելուն, և կոչ է անում Ռուսաստանի ղեկավարությանը դադարեցնել զենքի վաճառքն այդ երկրին:
Փորձագետն «Առաջին լրատվական»-ի հետ զրույցում մեկնաբանեց Ադրբեջանի ՊՆ-ի հաղորդագրությունը՝ Ռուսաստանի Դաշնության կողմից Ադրբեջանին զենքի և զինտեխնիկայի նոր խմբաքանակ մատակարարելու մասին: Խոսքը մասնավորապես «Քրիզանթեմա-Ս» հակատանկային հրթիռային համալիրներին մասին է:
Եվսեևը չի կարծում, թե ռուսական կողմն այս քայլով միտումնավոր փորձում է սրել ռազմական իրադրությունը Արցախյան հակամարտության գոտում: Ռուսաստանը շահագրգռված չէ իրավիճակի ապակայունացմամբ, պարզապես այնքան էլ հաջող ժամանակ չի ընտրվել զենքի հերթական խմբաքանակը Բաքու ուղարկելու համար: Իսկ ընդհանրապես Ռուսաստանը, ինչպես մեր զրուցակիցն է կարծում, շարունակում է զենքի մատակարարումը Ադրբեջանին՝ վերջինիս նկատմամբ ազդեցության լծակները պահպանելու նպատակով:
«Ենթադրում եմ, որ այս համալիրների մատակարարումը Ադրբեջանին պլանավորվել է նախապես: Սա պաշտպանական զենք է, բայց չեմ կարծում, որ դրա մատակարարումն այսօր անհրաժեշտ էր: Ըստ իս՝ անհաջող ժամանակ է ընտրվել մատակարարման համար: Այս պայմաններում, երբ իրավիճակը շարունակում է սրվել, Ադրբեջանն օգտագործում է հակատանկային «Սպայկ» հրթիռներ՝ Հայաստանի ուղղությամբ ռազմական օբյեկտին հարվածելու նպատակով, հարկավոր է շատ զգույշ լինել Ադրբեջանին հակատանկային հրթիռային համալիրներ տրամադրելու հարցում: Իմ կարծիքով՝ Ռուսաստանը պետք է վերանայի Ադրբեջանին մատակարարվող սպառազինության անվանացուցակը, որովհետև զենքի վաճառքը փաստացի հրահրում է Ադրբեջանին կրկնելու Ապրիլյան պատերազմը:
Ռուսաստանը շահագրգռված չէ իրավիճակի ապակայունացմամբ: Ռուսաստանը շարունակում է զենքի մատակարարումը Ադրբեջանին, որպեսզի նրա հանդեպ ունենա ազդեցության ինչ-որ լծակ, ոչ թե Ղարաբաղում պատերազմ սադրի: Ռուսաստանը շահագրգռված է Ղարաբաղի գոտում իրավիճակի կայունացմամբ, ուստի դա չէ սրա նպատակը: Սրա նպատակը Ադրբեջանի նկատմամբ ազդեցությունը պահպանելն է: Ըստ երևույթին, այս տրամաբանությամբ է առաջնորդվում Ռուսաստանը, բայց իմ կարծիքով՝ մատակարարման ժամանակ շատ անհաջող է»,- մեկնաբանեց Վլադիմիր Եվսեևը:
Փորձագետի խոսքերով՝ այն գործիչները, ովքեր իրականացնում են Ռուսաստանի այս քաղաքականությունն Ադրբեջանի ուղղությամբ, հավանաբար ելնում են այն համոզումից, թե պատերազմ Ղարաբաղում չի լինի: Բայց Վլադիմիր Եվսեևն այլ կարծիք ունի՝ ասելով, որ նոր պատերազմ, ամենայն հավանականությամբ, կլինի:
Անդրադառնալով «Քրիզանթեմա-Ս»-ի ռազմական նշանակությանը՝ փորձագետը փաստեց, որ թեև այն պաշտպանական զենք է համարվում, այնուամենայնիվ Ադրբեջանը կարող է կիրառել այս տեխնիկան հարձակողական նպատակներով, ինչպես եղավ «Սպայկ» հրթիռների պարագայում: Բայց Հայաստանը հետ չի մնում ադրբեջանական կողմից այս առումով: Հայկական զինուժը նույնպես ունի հակատանկային զինատեսակներ և կարող է օգտագործել դրանք հարձակման մեջ:
«Ցանկալի է, որ դադարեցվի զենքի մատակարարումն Ադրբեջանին: Որպես ռազմական փորձագետ, ով ենթադրում է, որ պատերազմ կլինի, կարծում եմ, որ այսօր չի կարելի զենք մատակարարել Ադրբեջանին, որովհետև իրավիճակը ծայրաստիճան վտանգավոր է: Զենքի ցանկացած մատակարարում կարող է հանգեցնել նոր պատերազմի, ուստի ես դեմ եմ Ադրբեջանին զենք մատակարարելուն»,- հայտարարեց ռազմական փորձագետ Վլադիմիր Եվսեևը:
