Եթե Հայաստանը ցանկանում է ազատվել Ռուսաստանի ռազմական կախվածությունից, ապա պետք է նախաձեռնող լինի: «Առաջին լրատվական»-ի հետ զրույցում այս մասին ասաց վերլուծաբան, EurasiaNet, The Atlantic, The Wilson Quarterly, Time, ForeignPolicy և արևմտյան մի շարք այլ պարբերականների հոդվածագիր Ջոշուա Կուչերան՝ անդրադառնալով միջազգայնագետների պնդումներին, թե Արևմուտքի՝ ԵՄ-ի և ԱՄՆ-ի պասիվության պատճառով Ռուսաստանը ճնշումներ բանեցրեց Հայաստանի վրա և «սեղմեց» ՀՀ անվտանգության «կոճակը», այնինչ ԱՄՆ-ն ու ԵՄ-ն կարող էին այլընտրանքներ առաջարկել այդ հարցում:
Խոսելով տարածաշրջանում ԱՄՆ-ի անվտանգության գործոնի ամրապնդման անհրաժեշտությունից՝ նա ասաց, որ եթե Հայաստանը ՆԱՏՕ-ին միանալու ցանկություն հայտներ, ապա ՆԱՏՕ-ն և ԱՄՆ-ն ուրախությամբ կողջունեին Հայաստանի այդ որոշումը: Ըստ նրա՝ երբեք նկատելի չի եղել, որ Հայաստանն առանձնապես արևմտյան կողմնորոշման ձգտի:
«Ես կարծում եմ, որ ԱՄՆ-ն ու Եվրոպան Հայաստանի համար կանեն այնքան, որքան Հայաստանը կցանկանա»,- նկատեց նա՝ շարունակելով, որ ԱՄՆ-ին այդ հարցերում ներգրավելը ոչ թե ԱՄՆ-ի, այլ Հայաստանի գործն է: Ջոշուա Կուչերայի խոսքով՝ եթե Հայաստանի հետաքրքրությունների շրջանակում է ազատվել Ռուսաստանի ռազմական կախվածությունից, ապա արևմտյան երկրներն ուրախ կլինեն օգնել այդ հարցում, սակայն նախաձեռնությունը պետք է լինի Հայաստանինը:
Հարցին՝ ՆԱՏՕ-Հայաստան համագործակցությունը կտուժի՞ արդյոք, եթե Հայաստանը միանա ՄՄ-ին, Կուչերան պատասխանեց, որ այդ համագործակցությունը բավականին հաջողակ էր, և քանի որ այն չափազանց փոքր մասշտաբներ է կրել, Ռուսաստանը դրանից սպառնալիք չի զգացել: «Իմ համոզմամբ՝ ՆԱՏՕ-Հայաստան համագործակցությունը չափազանց թույլ է, որպեսզի որևէ կերպ տուժի ՄՄ-ին միանալու Հայաստանի քայլից հետո: Դիտարկեք Ղազախստանի օրինակը՝ այդ երկիրը ՄՄ-ի անդամ պետություն է և միաժամանակ ունի ռազմական հարաբերություններ ԱՄՆ-ի հետ, բնականաբար՝ ավելի խորը, քան Հայաստանի դեպքում է: Բայց նրանք մտերիմ են Ռուսաստանի հետ նույնքան, որքան Հայաստանը»,- ասաց Ջոշուա Կուչերան: