Հունիսի 26-ին Խոշտանգումների զոհերի աջակցության միջազգային օրվան նվիրված միջոցառման ժամանակ ՀՀ գլխավոր դատախազության հատկապես կարևոր գործերով քննության վարչության պետի տեղակալ Կարեն Բիշարյանը ներկայացնում էր այն ամենը, ինչ արվել է 2016թ. հուլիսյան իրադարձություններից հետո: Բիշարյանի խոսքերով՝ 2016 թվականի հուլիսյան իրադարձությունների վերաբերյալ ներկայումս հատուկ քննչական ծառայությունում քննվում է երկու քրեական գործ, որոնք դեռևս ընթացքի մեջ են: Դրանցից մեկը ընդգրկում է 2016 թվականի հուլիսի 17-27-ն ընկած ժամանակահատվածը՝ Խորենացի փողոցում տեղի ունեցած իրադարձությունները: Կատարված գործողությունների վերաբերյալ մի քանի հոդվածներով քրեական գործ է հարուցված:
Քրեական գործ է հարուցվել նաև ոստիկանության ծառայողների կողմից իրենց պաշտոնեական լիազորությունները չարաշահելու, փաստաբանների և լրագրողների գործողությունները խոչընդոտելու առնչությամբ:
«Նախաքննությունը շարունակվում է, և բազմածավալ քննչական գործողություններ են իրականացվում: Ներկա պահին լրագրողների գործունեությունը խոչընդոտելու հետ կապված կա յոթ դատապարտված, և մեկ անձի վերաբերյալ քրեական գործը մեղադրական եզրակացությամբ արդեն դատախազությունում է, ըստ որի՝ դատախազությունն իր լիազորությունների շրջանակում որոշում կկայացնի: Այսինքն՝ ներկայումս ունենք դատապարտված յոթ քաղաքացի, ընդ որում ՝ 7-ից 4-ը դատապարտվել են ազատազրկման»,- նշել է Բիշարյանը:
Նրա խոսքերով՝ երկրորդ քրեական գործը վերաբերում է հուլիսի 19-20-ը Սարի թաղում տեղի ունեցած իրադարձություններին: «Այստեղ նույնպես քրեական գործը հարուցված է լրագրողների, փաստաբանների գործունեությունը խոչընդոտելու, ոստիկանության ծառայողների կողմից պաշտոնեական լիազորությունները չարաշահելու առնչությամբ»,- ասաց ՀՀ գլխավոր դատախազության հատկապես կարևոր գործերով քննության վարչության պետի տեղակալը և հավելեց, որ դեռևս վաղ է որևէ հետևություն անելը:
Խոսքի ազատության պաշտպանության կոմիտեի նախագահ Աշոտ Մելիքյանի խոսքերով՝ սակայն, այն ինչ որ ներկայացվում է Բիշարյանի կողմից, այդ աշխատանքները կատարվել են մոտ 6 ամիս առաջ: Դրանից հետո առանձնապես ոչ մի գործողություն չի կատարվել: «Վերջին կես տարվա կտրվածքով որևէ նոր մեղադրանք, մեղադրյալ, նոր կասկածյալ չի ներգրավվել: Այն տվյալները, որոնք ներկայացվել են, դրանք անցած տարվա հոկտեմբեր-նոյեմբեր ամսվա տվյալներ են: Դրանից հետո գործն առաջ չի գնացել: Գուցե ինչ-որ քննչական գործողություններ կատարվել են, բայց դա իրենց ներքին աշխատանքային պրոցեսն է: Բայց հանրագումարում որևէ նոր մեղադրյալ, կամ կասկածյալ առաջ չի եկել:Բայց մենք ունենք 20-ից ավելի անձ, որոնք տուժող են ճանաչվել»,-«Առաջին լրատվական»-ի հետ զրույցում ասաց Մելիքյանը, որը զբաղվում է Սարի թաղի գործողությունների ժամանակ տուժած լրագրողների գործերով:
Աշոտ Մելիքյանի խոսքերով՝ շուտով լրանալու է այդ իրադարձությունների 1 տարին, և եթե որևէ շոշափելի արդյունք չլինի, ապա իրենց կազմակերպությունը պատրաստվում է դիմել միջազգային կառույցներին և նրանց ուշադրությունը հրավիրել այս գործերի անարդյունավետ քննության վրա: «Այդ գործընթացը շատ դանդաղ և ոչ էֆեկտիվ է ընթանում: 6 ամսվա ընթացքում ոչ մի առաջընթաց չկա, և եթե այս ընթացքում որևէ նոր կասկածյալ կամ մեղադրյալ առաջ չի եկել, ուրեմն քննությունը շատ անարդյունավետ է ընթանում»,- ասաց Մելիքյանը՝ հավելելով, որ եթե պատշաճ քննություն գնար, ապա դժվար չէր մեղավորներին շատ արագ բացահայտել, քանի որ համացանցը ողողված է այդ օրվա իրադարձությունների տեսանյութերով, գործով որպես տուժող անցնում են լրագրողներ և օպերատորներ: «Ստեղծված իրավիճակում այս տեմպերով քննչական գործողություններ իրականացնելը վկայում է այն մասին, որ քննչական մարմինները նպատակ չեն դրել իրականում բոլոր մեղավորներին հայտնաբերել և պատասխանատվության ենթարկել»,- նկատեց Մելիքյանը։
Նշենք, որ Սարի թաղի դեպքերի ժամանակ տուժել էին նաև «Առաջին լրատվական»-ի լրագրող Մարիամ Գրիգորյանն ու օպերատոր Դավիթ Հարությունյանը: Նրանք մարմնական վնասվածքներ էին ստացել: Դավիթ Հարությունյանի մասով մեղավորին, կարծեք թե հայտնաբերել են, սակայն Մարիամ Գրիգորյանի մասով դեռ քննություն է գնում: Աշոտ Մելիքյանն ասաց, որ գործն իրենց ուշադրության կենտրոնում է և կպահեն այնքան, քանի դեռ մեղավորները պատասխանատվության չեն ենթարկվել:
Լուսանկարը՝ Photolure-ի
