Սեպտեմբերի 22-ին Սուրբ Էջմիածնի Մայր Տաճարում Սուրբ և Անմահ Պատարագից հետո, նախագահությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, կատարվել է խաղաղության աղոթք Սիրիայի և հոգեհանգստյան պաշտոն Սիրիայում զոհված բազում քրիստոնյաների համար:
Մինչ արարողության սկսվելը, ներկա գտնվող հավատացյալներին իր խոսքն է ուղղել Ամենայն Հայոց Հայրապետը: Նորին Սրբությունը մասնավորաբար ընդգծեց, որ Սիրիան հայ ժողովրդի համար հարազատ երկիր է, ուր հայ ժողովրդի բազում զավակներ հարյուրամյակներ առաջ և հատկապես Հայոց Ցեղասպանությունից հետո ապաստան են գտել և հնարավորություն ստացել ազատորեն կազմակերպելու իրենց հոգևոր-մշակութային կյանքը, եկեղեցիների կամարների ներքո կերտելու իրենց պայծառ ու շեն կյանքը:
Խոսելով ներկայիս Սիրիայում ստեղծված դժվարին կացության և սիրիահայ համայնքի կարիքների մասին՝ Ամենայն Հայոց Կաթողիկոսն ասաց. «Մենք հորդոր և հրավեր ենք բերում ձեզ, սիրելի՛ հայորդիներ, որպեսզի ըստ ամենայնի զորակցություն բերեք կարիքի մեջ գտնվող ձեր եղբայրներին ու քույրերին: Մենք հրավիրում ենք ձեզ նաև առատացնելու ձեր մշտական աղոթքը, որովհետև ձեր աղոթքը մխիթարություն պիտի պարգևի նրանց, միաժամանակ պիտի զորացնի նրանց հոգին` հաղթահարելու այդ դժվարությունները և խաղաղ ժամանակների հույսով ապրելու, որպեսզի կարողանան պահպանել այն ժառանգությունը, որ մեր հայրերը կերտել են Սիրիայի օրհնյալ երկրի մեջ»:
Մաղթելով, որ Բարձրյալ Տերն Իր սիրո ու ողորմության մեջ պահի համայն աշխարհը և ողջ մարդկությունը՝ Նորին Սրբությունը աղոթեց նաև հակամարտության ընթացքում զոհված բազում քրիստոնյաների համար` միաժամանակ հայցելով, որ Աստված երկնային լուսեղեն հարկերում ընդունի նրանց հոգիները և մխիթարություն պարգևի նրանց հարազատներին ու մերձավորներին:
