Այսօր ԱԺ նախագահ Հովիկ Աբրահամյանը, պատասխանելով «Առաջին լրատվական»-ի հարցին, թե ինչպե՞ս է վերաբերվում ընդդիմության կողմից առաջ քաշված խնդիրներին և երկխոսության համար ստեղծվելիք պատվիրակությանը, ասաց, թե բազմաթիվ առիթներով իշխանությունը հայտարարել է, որ պատրաստ է երկխոսության.
«Հիմա էլ մենք պատրաստ ենք երկխոսության, դա շատ ողջունելի քայլ է, որ արմատական ընդդիմությունը նման առաջարկ է ներկայացնում իշխանություններին։ Իմ կարծիքով, հանրապետության նախագահը կգնա այդ քայլին և կսկսի երկխոսությունը: Ես համարում եմ, որ դա բխելու է թե՛ Հայաստանի Հանրապետության, թե՛ հայ ժողովրդի շահերից»:
Իսկ թե ե՞րբ կսկսվի երկխոսությունը, ըստ Հովիկ Աբրահամյանի՝ դա հանրապետության նախագահի որոշելիքն է, հետևաբար նա էլ կորոշի։
Երկխոսության ֆորմատը, նրա ասելով, դեռ չեն քննարկել։ Հարցին, թե ինչպես են վերաբերվում ընդդիմության առաջ քաշած խնդիրներին, Հ.Աբրահամյանը պատասխանեց. «Ողջամիտ առաջարկները պատրաստ ենք քննարկել»:
