«Առաջին լրատվական»-ի զրուցակիցն է ՍԴՀԿ նորընտիր ատենապետ Հակոբ Տիգրանյանը:
– Պարոն Տիգրանյան, Ձեր ատենապետ ընտրվելու հանգամանքը շատերի համար անակնկալ էր, արդյո՞ք դա եղավ ներքին տարաձայնությունների արդյունքում. կարծես թե սպասվում էր, որ Սեդրակ Աճեմյանը կվերընտրվի:
– Իմընտրությունը ոչ թե ներքին տարակարծությունների արդյունք էր, այլ ընդհակառակը՝ այն Հնչակյան կուսակցությունում գոյություն ունեցող և գործող դեմոկրատական արժեքների արդյունք էր: ՍԴՀԿ-ն եկավ մեկ անգամ ևս փաստելու, որ այն երբեք անձերի կուսակցություն չի եղել, այլ հավաքական ուժ, որը հիմնված է գաղափարների և սկզբունքների վրա: Հնչակյան շարքային կուսակցականը երբեք չի գերադասել իր անհատականը, կուսակցությունը հավաքական է: Դրա ամենափայլուն օրինակն այսօր ընկեր Սեդրակ Աճեմյանի ներկայությունն է նորընտիր կենտրոնական վարչությունում:
– Ի՞նչ խնդիրներ եք տեսնում ՍԴՀԿ-ում չլուծված, ի՞նչ անելիքներ ունեք:
– ՍԴՀԿ-ն գործում է աշխարհի 17 տարբեր շրջաններում, և ամեն մի շրջանի խնդիրները տարբերվում են մյուսից: Իհարկե, Հայաստանի շրջանը ամենակարևոր շրջանն է և հատուկ ուշադրության արժանի: 19-րդ hամագումարից անմիջապես հետո առաջացած խնդիրները բացասական անդրադարձան հայաստանյան կառույցի գործունեության վրա, բայց կարծում եմ` դժվար oրերն արդեն անցյալում են ու 20-րդ hամագումարի հաղորդած լիցքով ու առաջադրանքներով Հայաստանի շրջանը առավել աշխույժ գործունեություն է ծավալելու Հայաստանի քաղաքական թատերաբեմում:
– Շատերի համար անհայտ է` կուսակցությունը հիմա ընդդիմադի՞ր է, թե՞ ինչպես նախագահական ընտրություններում, այնպես էլ հետագայում սատարելու եք իշխանություններին:
– Հնչակյան կուսակցությունը իր 126-ամյա գործունեության ընթացքում միշտ առաջնորդվել է իր գաղափարական սկզբունքներով և հանուն կուսակցական նեղ շահերի երբեք գործարքների մեջ չի մտել ոչ մեկի հետ՝ լինի դա իշխանություն կամ ընդդիմություն: Մենք տարիներ շարունակ առաջ ենք քաշել համակարգային փոփոխության գաղափարը՝ հավատալով, որ լոկ անձերի փոփոխությամբ հարցեր չեն լուծվելու: Մենք էությամբ ընդդիմադիր կուսակցություն ենք, քանի որ միշտ կանգնած ենք եղել հասարակ ժողովրդի կողքին ու պայքարել նրա իրավունքների համար: Ու քանի դեռ երկրում գոյություն ունի ընկերային անարդարություն, կաշառակերություն, հովանավորչություն ու սակավապետություն (օլիգարխիա), ուրեմն ընդդիմադիր ենք:Սակայն բոլորովին հակված չենք ամեն ինչ սև տեսնելու և սև նկարագրելու: Ամեն մի դրական տեղաշարժ մեր կողմից ողջունելի է: Մյուս կողմից, պատրաստ ենք համագործակցելու ցանկացած իշխանության հետ, երբ հարցը վերաբերվում է համայն հայության ընդհանրական շահերին, օրինակ՝ Ցեղասպանության 100 ամյակի կապակցությամբ կամ Սփյուռք-Հայրենիք կապերի առումով:
– Մամուլում պարբերաբար հրապարակումներ են լինում այն մասին, որ ձեր կուսակցությունը սերտ կապերի մեջ է ՀՀ վարչապետ Տիգրան Սարգսյանի հետ, և դա է պատճառը, որ երբեմնի ընդդիմադիր կուսակցությունն այժմ արդեն իշխանամետ է:
– Ինչպես արդեն ասացի Հնչակյան կուսակցությունը միշտ առաջնորդվել է իր գաղափարական սկզբունքներով ու իր քաղաքական ուղեգիծն ու դիրքորոշումները հիմնել է համագումարներում առնված որոշումների վրա, այլ ոչ թե անձնական կապերի կամ նախաձեռնությունների վրա: Որպես կառավարության ղեկավարի, մենք վարչապետ Տիգրան Սարգսյանի հետ ունենք հարգալից և գործնական հարաբերություններ, ու մեր ներքին կուսակցական հարցերի վերաբերյալ ոչ քննարկում է տեղի ունեցել նրա հետ և ոչ էլ միջամտություն նրա կողմից:
– Կուսակցության Կիպրոսի համագումարում որոշվել է, որ այն պետք է Հայաստանակենտրոն լինի՝ համահնչակյան ամբողջ կենտրոնական վարչությունը պետք է գործի մայր հողի վրա: Դա նշանակում է, որ կուսակցության կենտրոնական վարչության անդամները պետք է գոնե Հայաստանում ապրեն, արդյո՞ք պատրասվում եք տեղափոխվել Հայաստան: Ի դեպ, այս տեղեկությունը տիկին Լյուդմիլա Սարգսյանն է պնդում:
– Սոցիալ-դեմոկրատ հնչակյան կուսակցության 20-րդ համագումարը վերահաստատեց Հայաստանակենտրոն լինելու հանգամանքը: Հետևաբար երբեք բացառված չէ մոտ ապագայում կենտրոնի ատենապետի տեղափոխությունը Հայաստան: Վստահեցնում եմ, որ գալիք օրերին քննարկման կենտրոնում հենց այդ հարցն է լինելու:
Լուսանկարը՝ PanARMENIAN Photo-ի
