Միացյալ Նահանգների պետքարտուղար Ջոն Քերրին Հայաստանի անկախության 22-րդ տարեդարձի առթիվ իր շնորհավորական ուղերձն է հղել հայ ժողովրդին՝ համայն հայությանը մաղթելով ուրախ և բարգավաճ Անկախության օր, խաղաղություն և երջանկություն առաջիկա տարիներին։
«Ազատություն» ռադիոկայանի փոխանցմամբ՝ ուղերձում, որը հրապարակվել է ԱՄՆ պետքարտուղարության պաշտոնական կայքէջում, մասնավորապես, ասված է.- «Նախագահ Օբամայի և ամերիկյան ժողովրդի անունից ես իմ ջերմագույն մաղթանքներն եմ փոխանցում Հայաստանի ժողովրդին՝ Անկախության օրվա կապակցությամբ։ Միացյալ Նահանգները և Հայաստանը ամուր հարաբերություններ ունեն՝ հիմնված պատմական կապերի և փոխադարձ հարգանքի վրա։ Ես հպարտ եմ և շնորհակալ հայկական համայնքում շատերի հետ երկարատև բարեկամության համար։ Իբրև մի մարդ, ով երեք տասնամյակ ներկայացրել է Մասաչուսեթսը, նահանգ, որը Հայաստանից դուրս գտնվող հայերի ամենախոշոր բնակավայրերից մեկն է, ես անմիջական տեղեկություններ ունեմ ամերիկյան մշակույթում, ժողովրդավարության և տնտեսական կենսունակության մեջ ձեր կատարած ներդրումների մասին»։
«Այսօր երկու երկրները միասին աշխատում են տարածաշրջանային և երկկողմանի դինամիկ օրակարգի վրա։ Մենք ակնկալում ենք ավելի ուժեղացնել տնտեսական և առևտրային կապերը մեր ժողովուրդների միջև այնպիսի համաժողովների միջոցով, ինչպիսիք են ԱՄՆ-Հայաստան տնտեսական ուսումնասիրության խումբը։ Ես ցանկանում եմ համայն հայությանը ուրախ և բարգավաճ անկախության օր, խաղաղություն և երջանկություն առաջիկա տարիներին»,- ասված է ԱՄՆ-ի պետքարտուղարի շնորհավորական ուղերձում։
