GIGAfootball.net կայքի փոխանցմամբ, Եվրոպայում ավարտվեց 2010/11 մրցաշրջանը։ Մադրիդի «Ռեալ»-ի ու «Բարսելոնա»-ի գոլահարներ պորտուգալացի Կրիշտիանու Ռոնալդուն ու արգենտինացի Լիոնել Մեսին մրցաշրջանի ընթացքում խփեցին 53-ական գոլեր։ Նրանց գոլերը վճռորոշ եղան իրենց թիմերի համար և օգնեցին նրանց՝ մյուս թիմերի նկատմամբ գերիշխող դիրք գրավելու։
Պորտուգալացու ակտիվում գրանցվել է Արքայական գավաթում հաղթանակն ու «Ոսկե խաղակոշիկ» մրցանակը՝ խփած 40 գոլերի համար (յուրաքանչյուր 72 րոպեում՝ մեկ գոլ)։ Իսկ արգենտինացու հաշվին գրանցվել է «Լա Լիգա»-ում (Իսպանիայի առաջնություն) ու Չեմպիոնների լիգայում տարած հաղթանակը և «Լա Լիգա»-ում խփած 31 գնդակները (յուրաքանչյուր 83 րոպեում՝ մեկ գոլ)։
Ընդ որում, Ռոնալդուն նախորդ տարի «Լա Լիգա»-ում խփել է 26 գոլ, իսկ Մեսին՝ 34 գոլ։ Վերջինս այս մրցաշրջանում Չեմպիոնների լիգայում խփել է 12 գնդակ, այսինքն 4-ով ավելի, քան նախորդ տարի։
«Լա Լիգա»-ում Ռոնալդուն ու Մեսին միասին խփել են 71 գնդակ՝ գերազանցելով բոլոր ռեկորդները։ Իտալական «Սերիա Ա»-ի լավագույն ռմբարկուներ Անտոնիո Դի Նատալեն («Ուդինեզե») ու Էդիսոն Կավանին («Նապոլի») համատեղ խփել են 54 գնդակ։
Եթե հաշվի առնենք ողջ մրցաշրջանի ընթացքում Ռոնալդուի ու Մեսիի խաղաժամանակն ու խփված 53-ական գոլերը, ապա կտեսնենք, որ միջին ցուցանիշով Մեսին փոքր-ինչ գերազանցել է Ռոնալդուին։ Մեկ գոլ խփելու համար Մեսիից միջինը պահանջվել է 86.2 րոպե, մինչդեռ Ռոնալդուի պարագայում այդ ցուցանիշը կազմել է 86.8 րոպե։
Մեսին «Լա Լիգա»-ում մասնակցել է 33 հանդիպման, խփել 31 գոլ և կատարել 18 գոլային փոխանցում, Արքայական գավաթ-ում՝ 7 հանդիպման (7 գոլ և 3 գոլային փոխանցում), Իսպանիայի սուպերգավաթում՝ 2 հանդիպման (3 գոլ), Չեմպիոնների լիգայում՝ 13 հանդիպման (12 գոլ, 3 գոլային փոխանցում)։
Ռոնալդուն «Լա Լիգա»-ում մասնակցել է 34 հանդիպման, խփել 40 գոլ և կատարել 10 գոլային փոխանցում, Արքայական գավաթ-ում՝ 8 հանդիպման (7 գոլ և 1 գոլային փոխանցում), Չեմպիոնների լիգայում՝ 12 հանդիպման (6 գոլ, 4 գոլային փոխանցում)։
Փաստորեն, երկբևեռ (Մադրիդի «Ռեալ» ու «Բարսելոնա») իսպանական ֆուտբոլն այսուհետ ունի նաև իր երկու վառ ընդգծված անհատականությունները։
Տեսանյութեր
