Անկախությունն ինքն արժեք է: Թերություններն ու սխալները, որոնց հետ առնչվում ենք, և գնալով ավելի շատ, քան նախկինում, չեն կարող իջեցնել անկախության արժեքը, գինը: Սեպտեմբերի 19-ին լրագրողների հետ հանդիպմանը նման տեսակետ հայտնեց Մարդու իրավունքների առաջին պաշտպան Լարիսա Ալավերդյանը: Նրա խոսքերով՝ անկախությունը հստակ կապվում է մեկ այլ գաղափարի՝ ազատության հետ: «Դժվար է ազատությունը պատկերացնել կախյալ վիճակում, ինձ համար այդ երկու հասկացությունն անբաժանելի են, միասնական: Ազատությունը պետականության կամ պետության գաղափարին զոհաբերողները չեն ունենում ո՛չ առաջինը, ո՛չ երկրորդը: Սա ինձ համար կարևորագույն ուղերձ-ուղենիշ է»,- ասաց նա:
Ալավերդյանին մտահոգում են մամուլում վերջին շրջանում հայտնվող տեսակետներն, ըստ որոնց՝ 22 տարի առաջ անկախության համար պայքարի խնդիր չի եղել, անկախությունը մեզ միևնույն է՝ կնվիրվեր: Բանախոսը նշեց, որ այդ տեսակետը հնչում է մեծապես այն մարդկանց կողմից, ովքեր իրենց ցանկացած տեսակ պայքարից հեռու են պահել: «Մենք հանուն անկախության ունեցել ենք շատ կորուստներ, նաև՝ մարդկային: Անկախությունը միշտ պահանջում է նվիրվածություն, նվիրյալների կրիտիկական թիվ. դա Հայաստանը տվել է: Պետք չէ այդ պայքարը ստվերել հետագայում ունեցած ձախողումներով, սխալներով, այն մեծ արժեք ունի»,- ասաց Ալավերդյանը:
Նա նշեց, որ իր համար հպարտության առիթ է այն, որ Անկախության հանրաքվեն, իր ամուսնու առաջարկությամբ, կայացել է ոչ թե սեպտեմբերի վերջին, այլ նախավերջին կիրակին՝ իր ծննդյան օրը՝ սեպտեմբերի 21-ին: Վերջինիս համոզմամբ՝ անկախությունը նաև «պատասխանատվության մի բեռ» է, որին մեր քաղաքական էլիտան չի դիմանում:
ՄՄ Հայաստանի անդամակցման թեմային անդրադառնալով՝ ՄԻ առաջին պաշտպանը նշեց, որ որոշումն ընդունվել է միանձնյա, համենայնդեպս՝ տպավորությունն այդպիսին է: Ալավերդյանի խոսքերով՝ Հայաստանի կողմից Եվրասիական միության հետ համագործակցությանն ուղղված մի շարք միջոցառումներ են կատարվել մշտապես, բայց այդքանով հանդերձ՝ մշտապես բարձրաձայնվել է ԵՄ ուղղությունն ընտրելու մասին:
