ՀՀ Կենտրոնական ընտրական հանձնաժողովի դեմ ՀՔԱ Վանաձորի գրասենյակի հայցը ՀՀ Վարչական դատարանը վարույթ է ընդունել: Դրանով Կազմակերպությունը պահանջել է պարտավորեցնել ՀՀ ԿԸՀ-ին պատշաճ պատասխան տրամադրել իր՝ 2017թ. մարտի 30-ի դիմում-առաջարկին: Այդ մասին հայտնում է ՀՔԱ Վանաձորի գրասենյակը:
ՀՀ ԱԺ 2017թ. ապրիլի 2-ի ընտրությունների նախընտրական քարոզչության ընթացքում տեղի ունեցած խախտումների վերաբերյալ ՀՔԱ Վանաձորի գրասենյակը պարբերաբար վարչական վարույթ հարուցելու առաջարկություններ է ներկայացրել ՀՀ Կենտրոնական ընտրական հանձնաժողով: Հանձնաժողովը դրանք դիտարկել է որպես դիմումներ և մերժել վարույթի հարուցումը: Իր որոշումները ՀՀ ԿՀԸ-ն մեկնաբանել է նրանով, որ Կազմակերպության իրավունքներն անմիջականորեն չեն խախտվել, և վերջինս նման դիմումներ ներկայացնելու իրավունք չունի:
Մինչդեռ առաջարկություններ ներկայացնելու ՀՀ քաղաքացիների իրավունքն ամրագրված է ՀՀ Սահմանադրության 53-րդ հոդվածով և օրենքներով, և ըստ դրա՝ Կենտրոնական ընտրական հանձնաժողովը պարտավոր է օրինական և հիմնավոր պատասխան ներկայացնել:
Համանման դիմում-առաջարկ ՀՔԱ Վանաձորի գրասենյակը ներկայացրել է նաև 2017թ. մարտի 26-ին «Գորիսի մեդիա գրուպ» կոչվող լրատվական կայքում հրապարակված նյութի վերաբերյալ: Դրանում Գորիսի պետական համալսարանի մի խումբ ուսանողներ շնորհակալություն էին հայտնում պատգամավորության թեկնածու Առուշ Առուշանյանին Գառնու հեթանոսական տաճար և Գեղարդի վանք իրենց այցելությունները ֆինանսավորելու համար և պատգամավորության թեկնածուին հաղթանակ էին մաղթում առաջիկա ընտրություններում: Հաշվի առնելով, որ տեղի ունի ՀՀ Ընտրական օրենսգրքի՝ նախընտրական քարոզչության հիմնական սկզբունքները սահմանող 19-րդ հոդվածի դրույթների խախտում՝ 2017թ. մարտի 30-ին ՀՔԱ Վանաձորի գրասենյակը դիմել է ՀՀ ԿԸՀ՝ նյութի հիման վրա վարչական վարույթ հարուցելու և ՀՀ Վարչական դատարան դիմելու հարցով:
Հայցադիմումը դատարան ներկայացրած ՀՔԱ Վանաձորի գրասենյակի ներկայացուցիչ Արթուր Հարությունյանն ասաց, որ եթե դատարանը բավարարի իրենց պահանջը, ապա դրանով իրավասու մարմնի կողմից դիմումները քննարկելու և պատշաճ պատասխան տրամադրելու որոշակի պրակտիկա կսահմանվի, քանի որ դաշտը կարգավորող օրենք իրականում գոյություն չունի:
«Քանի որ մեր Ընտրական օրենսգիրքը չի սահմանում կարգավորում, որպեսզի դիտորդը ընտրական խախտումների հետ կապված դիմի ընտրական հանձնաժողովներին, ապա մենք որոշեցինք, որ պետք է դիմենք հանրագրի, այսինքն՝ հանրային հետաքրքրություն ներկայացնող հարցերը բարձրացնենք ընտրական հանձնաժողովին և ստանանք պատշաճ պատասխան: Ընտրական հանձնաժողովները մեզ չեն պատասխանել, դրանցով պայմանավորված՝ վարչական վարույթներ հարուցելու պահանջները մերժվել են, և մենք որոշեցինք դիմել դատարան»,- «Առաջին լրատվական»-ի հետ զրույցում ասաց Հարությունայնը՝ հավելելով, որ իրենք փորձում են դատական ճանապարհով հասնել նրան, որ դատարանը պարտավորեցնի ԿԸՀ-ին, որպեսզի իրենց դիմումին տրվի պատշաճ պատասխան:
Ինչպես արդեն նշեցինք, նման բովանդակությամբ ևս մեկ դատական հայց կա դատարանում: Արթուր Հարությունայնն ասաց, որ այդ դիմումով էլ իրենք ԿԸՀ-ի ուշադրությունը մի քանի խնդրի վրա են հրավիրել, սակայն դրանք քննարկման առարկա չեն դարձել: «Այսինքն՝ մենք նպատակ ենք հետապնդում, ակնկալում ենք, որ դատարանի կողմից մեր պահանջների բավարարմամբ կլինի փոփոխություն, որից հետո վարչական մարմինները կհասկանան, որ ներկայացված առաջարկությունների վերաբերյալ պետք է ժամանակին պատասխան տրամադրեն, և այդ պատասխանը պետք է լինի բովանդակային»:
