Սիրիայի առաջնորդ Բաշար Ասադը դեռևս չի որոշել՝ կմասնակցի՞ հաջորդ տարվա մայիսին կայանալիք Սիրիայի նախագահի ընտրություններին, թե՞ ոչ: Այս մասին նա հայտնել է Fox News-ին տված հարցազրույցում: Զրույցը տեղի է ունեցել երեքշաբթի՝ Դամասկոսում:
Նրա խոսքով՝ այդ շրջանում պետք է իմանալ ժողովրդի կամքը՝ հասկանալու համար, թե ցանկանո՞ւմ են արդյոք, որ ինքը մասնակցի նախագահական ընտրություններին: «Այժմ չափազանց վաղ է: Մինչ ընտրությունները որոշում ընդունելու հնարավորություն կունենամ»,- ասել է Ասադը:
Նրա խոսքով՝ իր նախագահ լինելու հարցը պետք է լուծի սիրիացի ժողովուրդը՝ քվեաթերթիկների օգնությամբ, ոչ մեկ ուրիշը՝ ո´չ ընկեր, ո´չ թշնամի:
Ասադն ընդգծել է, որ այնպիսի ընկերը, ինչպիսին Ռուսաստանն է, երբեք չի միջամտում իր երկրի ներքին գործերին: Նրա խոսքով՝ դա անում են միայն ԱՄՆ-ն ու «նրա որոշ խամաճիկներ»:
Ասադի խոսքով՝ Սիրիայի քաղաքացիների մեծ մասը, նույնիսկ նրանք, ովքեր սկզբում դեմ էին իշխանություններին, բախվելով ահաբեկչության և կրոնական ծայրահեղականության դրսևորումներին, այժմ աջակցում են կառավարությանը:
