Ֆուտբոլի Վրաստանի ազգային հավաքականը երեկ Թբիլիսիում ընկերական խաղում 3:0 հաշվով առավելության է հասել Սենտ Քիթս և Նևիսի նկատմամբ: Հանդիպման գլխավոր մրցավար Զավեն Հովհաննիսյանը 1:0 հաշվի ժամանակ 11 մետրանոց հարված է նվիրել դաշտի տերերին: Տեսագրությունը դիտելով համոզվում ենք, որ Սենտ Քիթս և Նևիսի խաղացողը վիճելի խախտումը կատարում է տուգանային հրապարակի մատույցներից դուրս: Ի դեպ, հայ մրցավարների կողմից սա առաջին նվերը չէ Վրաստանին:
Մարտի 28 Վրաստանի ազգային հավաքականը կրկին Թբիլիսիում տեղի ունեցած ընկերական խաղում Թբիլիսիում 5:0 հաշվով առավելության էր հասել Լատվիայի ընտրանու նկատմամբ:
Հանդիպման 18-րդ րոպեին դաշտի տերերը հաշվի մեջ առաջ էին անցել հայաստանցի գլխավոր մրցավար Սուրեն Բալիյանի նշանակած խիստ կասկածելի 11 մետրանոց հարվածի շնորհիվ: Կրկնապատկերը դիտելիս համոզվում ենք, որ տվյալ դրվագում լատվիացի պաշտպանը կանոնները չի խախտում: Վրացի ֆուտբոլիստը ակնհայտ սիմուլյացիայի էր դիմել: Վրացի երկրպագուները սոցիալական ցանցերում նշել էին, որ Բալիյանը 11 մետրանոնց է նվիրել եղբայրական Վրաստանին:
Ի դեպ, հունիսի 5-ին Հայաստան-Սենտ Քիթս և Նևիսի հանդիպումը սպասարկել էր վրացի Լաշա Սիլագավան: Վերջինս Սենտ Քիթս և Նևիսի դարպասին չնշանակեց 100 տոկոսանոց 11 մետրանոց հարվածը: Տվյալ դրվագում մրցակցի պաշտպանը սեփական տուգանային հրապարակում տապալեց Մարկոսին:
