Հունիսի 10-ին Պոդգորիցայում կայանալիք աշխարհի առաջնության ընտրական փուլի Մոնտենեգրո-Հայաստան հանդիպումից առաջ լարված իրավիճակ է ստեղծվել բալկանյան հավաքականի շուրջ: Մամուլի և երկրպագուների կողմից մեծ ճնշում է գործադրվում հավաքականի ֆուտբոլիստների և գլխավոր մարզիչ Լյուբիշա Տումբակովիչի վրա: Պարտության դեպքում Տումբակովիչը ըստ ամենայնի ստիպված կլինի հրաժարական տալ:
«Սա լինելու է կյանքի և մահվան խաղ: Պարտության դեպքում աշխարհի առաջնության ուղեգրի համար պայքարը կարելի կլինի ավարտված համարել: Հունիսը սև ամիս է մեզ համար, բայց պետք է մոռանանք անցյալը: Տումբակովիչի առաջ Հայաստանի դեմ խաղում մեկ խնդիր է դրված՝ կասեցնել Հենրիխ Մխիթարյանին: Առանց Մխիթայանի հայկական թիմը միջինից էլ ցածր ֆուտբոլ է ցուցադրում: Մոնտենեգրոյի հետ հանդիպումից առաջ Հայաստանը բավական թույլ մրցակից էր ընտրել՝ Կարիբյան ծովում գտնվող Սենթ Քիթս կղզու հավաքականին: Մխիթարյանը խաղաց 45 րոպե: Երկրորդ կեսում առանց «Մանչեսթեր Յունայթեդի» կիսապաշտպանի Հայաստանի հավաքականը զգալի թուլացել էր»,- նման կարծիքի է Մոնտենեգրոյի reprezentacija.me պարբերականի վերլուծաբանը:
Մոնտենեգրոյի հավաքականի գլխավոր մարզիչը, սակայն, միանգամայն այլ կարծիքի է: «Ես համակարծիք եմ այն մասնագետների հետ, ովքեր պնդում են, որ Հայաստանը բավական ուժեղ կիսապաշտպանություն ունի՝ Հենրիխ Մխիթարյանի գլխավորությամբ: Բավական ուժեղ է նաև հայերի պաշտպանական գիծը: Ընտրական փուլում Դանիայի և Լեհաստանի հետ հանդիպումներում Հայաստանի հավաքականի բախտն ուղղակի չբերեց: Ռումինիայի հավաքականից Երևանում 5:0 հաշվով կրած պարտությունն էլ ուժերի դիսբալանսի հետևանք էր: Ամբողջ հանդիպումը ռումինացիներն անցկացրին 11, իսկ հայերը՝ 10 ֆուտբոլիստներով: Նշեմ, սակայն, որ մենք ունենք ուժ և որակ առաջիկա խաղում երեք միավոր վաստակելու համար: Այս հարցում մեզ կաջակցեն նաև երկրպագուները»,- ասել է Տումբակովիչը:
Վերջինս առաջնային է համարում պաշտպանության առկա խնդիրը և հիմնական դարպասապահ Մլադեն Բոժովիչի բացակայությունը: Նա Հայաստանի հավաքականի հետ հանդիպումը բաց կթողնի մեջքի և ազդրի շրջանում ստացած վնասվածքի պատճառով: «Բոժովիչի կորուստը մտահոգիչ է: Ցավում եմ, որ հավաքականում չի նաև Մարկո Վեսովիչը, ով մեկ շնչով կարող էր կարգավորել խաղը պաշտպանության կենտրոնում: Այս պահին հարցականի տակ է կիսապաշտպան Նիկոլա Վուկևիչի մասնակցությունը: Նա վնասվածք էր ստացել «Բրագայում» և մոտ մեկ ամիս չի խաղացել: Ամեն ինչ անում ենք, որպեսզի նա վերականգնվի մինչև Հայաստանի հավաքականի հետ հանդիպումը»,- ավելացրել է Տումբակովիչը:
Նշենք, որ Մոնտենեգրոն Եվրոպայի ամենաերիտասարդ և հեռանկարային հավաքականներից մեկն է: Հարցին՝ կարո՞ղ է երիտասարդ կազմով Մոնտենեգրոյի հավաքականը իրականացնել երկրպագուների երազանքը և նվաճել աշխարհի առաջնության եզրափակիչ փուլի ուղեգիրը, Տումբակովիչը պատասխանել է. «Ով ինձ ճանաչում է, գիտի, որ ես ստեղծող մասնագետ եմ: Ինձ համար շատ կարևոր է լուրջ արդյունքների հասնելը և պատվով հեռանալը: Ես ստեղծեցի «Պարտիզանը», այս թիմի հետ նվաճեցի տիտղոս և հեռացա թիմից: Ինձ փոխարինած Լոթար Մատեուսը «Պարտիզանի» հետ նվաճեց Չեմպիոնների լիգայի խաղարկության եզրափակիչ փուլի ուղեգիր: Այս կազմով մենք ամեն ինչ կանենք աշխարհի առաջնության եզրափակիչ փուլի ուղեգիր նվաճելու համար: Կպայքարենք մինչև վերջ: Բայց իմ գլխավոր նպատակը այնպիսի կոլեկտիվ ձևավորելն է, որը առաջիկա 2-3 ընտրական փուլերում կլինի եզրափակիչ փուլի ուղեգիր նվաճելու իրական հավակնորդ»:
Նշենք, որ Հայաստանի հավաքականը մրցավայր է մեկնելու վաղն առավոտյան: Նույն օրը մեր ֆուտբոլիստները վերջին մարզումը կանցկացնեն կարևորագույն հանդիպումից առաջ: Մոնտենեգրո-Հայաստան հանդիպումը կայանալու է Պոդգորիցայի «Գրադսկի» մարզադաշտում և կսկսվի Երևանի ժամանակով 22:45-ին:
