Հայաստանի Ազգային ժողովն առաջին ընթերցմամբ միաձայն ընդունեց «Կոռուպցիայի կանխարգելման հանձնաժողովի մասին» և հարակից օրենքների նախագծերի փաթեթը:
Օրենսդրական նախաձեռնությանը միաձայն կողմ քվեարկեց 87 պատգամավոր: Քվեարկությունից առաջ վարման կարգի վերաբերյալ ելույթ ունեցավ «Ելք» խմբակցության ղեկավար Նիկոլ Փաշինյանը: Նա հայտնեց, որ իրենք դրական են տրամադրված օրենքի նախագծի նկատմամբ և կողմ են քվեարկելու»: Իհարկե, սա մեր բոլոր ցանկություններն արտահայտող նախագիծ չէ, սակայն մենք կարծում ենք, որ սա քայլ առաջ է և կողմ ենք քվեարկելու» -, ասաց Փաշինյանը:
Վարման կարգի վերաբերյալ ելույթ ունեցավ նաև «Ծառուկյան» խմբակցության պատգամավոր, Ազգային ժողովի փոխնախագահ Միքայել Մելքումյանը: Նա ընդգծեց, որ նախագիծը մանրամասն քննարկել են Արփինե Հովհաննիսյանի հետ, իրենց առաջարկներն ընդունվել են: Նա նշեց, որ կարողացել են կոնսենսուսի գալ և կողմ են քվեարկելու օրենսդրական նախաձեռնությանը:
Խորհրդարանը միաձայն քվեարկությամբ առաջին ընթերցմամբ ընդունեց նաև Հանրային ծառայությունները կարգավորող մարմնի մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագիծը, որին կողմ քվեարկեց 88 պատգամավոր:
