ԿԸՀ-ն մերժեց դիտորդների գրեթե բոլոր բողոքները

Կենտրոնական ընտրական հանձնաժողովը հունիսի 6-ի նիստում քննում էր Երևանի ավագանու ընտրություններին դիտորդական առաքելություն իրականացրած «Իրավունքի Եվրոպա միավորում» հասարակական կազմակերպության և դիտորդների բողոքները ընդդեմ տասը Տարածքային ընտրական հանձնաժողովների որոշումների:

Դիտորդները համարում են, որ բոլոր ՏԸՀ-ներում իրենց դիմումները պատշաճ քննության չեն ենթարկվել: «Իրավունքի Եվրոպա միավորում» ՀԿ-ի ներկայացուցիչ Տիգրան Եգորյանը ԿԸՀ-ին միջնորդեց նիստին որպես վկա հրավիրել դիտորդներին և Տարածքային ընտրական հանձնաժողովների անդամներին, որպեսզի իրենք տեղում բացատրություններ և պարզաբանումներ տան իրենց դիտարկումների, փաստական հանգամանքների շուրջ: Բացի դրանից, պատշաճ վարչարարությամբ արդյունավետ քննություն իրականացնելու նպատակով միջնորդություններ ներկայացվեցին դիտորդների կողմից ներկայացված ապացույցները հետազոտելու մասին, ինչպես նաև հանձնաժողովների անդամներին և քվեարկության սենյակում ներկա գտնված անձանց որպես վկա հրավիրելու, գրանցամատյանները և տեսախցիկների տեսանյութերը հետազոտելու մասին, որոնք մերժվեցին:

ԿԸՀ նախագահ Տիգրան Մուկուչյանը նկատեց, որ դիտորդները նաև դիմումատու են և ծանուցված են եղել նիստի մասին, սակայն չեն ներկայացել: «Եթե չեն ներկայացել, չի նշանակում, թե իրենք պատրաստ չեն իրացնելու իրենց իրավունքը»,- առարկեց Եգորյանը: Հաշվի առնելով, որ Երևանի ավագանու ընտրություններից հետո մոտ մեկ ամիս անց ԿԸՀ-ն նիստ է հրավիրում և դրա մասին ծանուցում նիստի նախորդ օրը՝ ժամը 17:30-ի սահմաններում, այդ ծանուցումը չի կարող համարվել պատշաճ:

Հանձնաժողովը կուռ միասնությամբ մերժեց բոլոր միջնորդությունները՝ համարելով դրանք անհիմն: Որոշումներն ընդունվում էին միաձայն:

Եգորյանը տեղեկացրեց, որ ընտրության օրը ընտրախախտումներ արձանագրած դիտորդին է զանգահարել ԿԸՀ-ի աշխատակից Լիլյան և մտերմիկ տոնով խորհուրդ տվել «սրտին մոտ չընդունել խախտումները, բոլոր խախտումները չեն, որ պետք է արձանագրել»: ԿԸՀ անդամները ոգևորված արձագանքեցին, որ իրենք «3-4 հատ Լիլյա ունեն»: Եվ Լիլյային նիստին հրավիրելու միջնորդության մերժումն էր միայն, որ տարբերվեց մյուս քվեարկություններից: ԿԸՀ անդամներից մեկը կողմ էր Լիլյային որպես վկա հրավիրելուն:

Եգորյանի մյուս մերժված միջնորդությունները վերաբերում էին ընտրատեղամասերի գրանցամատյաններն ու տեսաձայնագրությունները քննության առարկա դարձնելուն:

Տիգրան Մուկուչյանն առարկեց՝ նշելով, թե հանձնաժողովն արդեն ուսումնասիրել է վարույթում առկա բոլոր նյութերը: Ինչ վերաբերում է բողոքների ուսումնասիրությանը, ապա Տիգրան Մուկուչյանի բացակայության ընթացքում ԿԸՀ քարտուղար Արմեն Սմբատյանը խոստովանեց, որ բողոքների մեծաքանակ լինելու պատճառով իրենք աշխատանքի բաժանում են իրականացրել և բաժանել են դրանք ԿԸՀ անդամների միջև, և նրանցից յուրաքանչյուրը հետազոտել է վարչական վարույթի նյութերը և ներկայացրել է որոշման նախագիծ մեկ-երկու բողոքի վերաբերյալ:

Տիգրան Եգորյանը շնորհակալություն հայտնեց Սմբատյանին անկեղծանալու համար. «Մենք այդպես էլ ենթադրում էինք, որ հանձնաժողովի անդամները բողոքները բաժանում են իրար միջև, և փաստորեն բոլոր անդամները ծանոթ չեն բոլոր բողոքների բովանդակությանը և վարչական վարույթի նյութերին»: Սմբատյանը, փորձելով շտկել իրավիճակը, հակադարձեց, թե բոլոր անդամները ծանոթացել են բողոքների բովանդակությանը, սակայն որոշման նախագծերը կազմել են առանձին-առանձին:

Տիգրան Եգորյանի գնահատմամբ՝ այդ գործընթացը չի կարող համարվել պատշաճ վարչարարություն. «Փաստորեն ԿԸՀ անդամները քվեարկում են ոչ թե իրենց կողմից հետազոտված և քննարկված փաստերի վրա հիմնվելով, այլ զուտ կոլեգիալության սկզբունքին հավատարմության և միմյանց նկատմամբ վստահության վրա հիմնվելով»,- «Առաջին լրատվականի» հետ զրույցում ասաց Եգորյանը:

Ավելին, նիստի ընթացքում պարզվեց, որ մի դեպքով դիմումատուների ներկայացրած ապացույցները չեն կցվել վարչական վարույթի նյութերին և հետևաբար չեն հետազոտվել: Այդ կապակցությամբ ներկայացվեց երկու միջնորդություն՝ գործի նյութերին այդ ապացույցները կցելու և հետազոտելու, որոնցից բավարարվեց գործի նյութերին կցելու միջնորդությունը, իսկ հետազոտելունը մերժվեց, ինչը լրացուցիչ ապացույց է ԿԸՀ կողմից պատշաճ վարչարարություն չիրականացնելու:

Երեկ ԿԸՀ-ն բավարարել էր որոշ բողոքներ, այդ թվում՝ դիտորդ Գայանե Գրիգորյանի իրավունքների սահմանափակմանը վերաբերող բողոքի վերաբերյալ ՏԸՀ որոշման դեմ բողոքը: Մնացած բոլոր ՏԸՀ որոշումները ԿԸՀ-ի կողմից ճանաչվեցին իրավաչափ:

Փաստորեն, ԿԸՀ-ն իրականացրեց վարույթ, որը բացի այն որ չի եղել պատշաճ և արդյունավետ, նաև այդ վարույթներին դիմումատուները մասնակից չեն դարձվել, այլ ուղղակի հրավիրվել են դրանց արդյունքում կազմված նախագծերի…