Երևանի քաղաքապետարանին տրամադրելու համար Տարածքային կառավարման նախարարությանը այս տարվա չորրորդ եռամսյակում 8 մլրդ 926 մլն 893.6 հազար դրամ կհատկացվի: Հարցը ներառված է Կառավարության սեպտեմբերի 19-ի նիստի օրակարգում:
Այդ գումարից 7 մլրդ 485 մլն 24.6 հազար դրամը կուղղվի Երևան քաղաքում ասֆալտբետոնյա ծածկի հիմնանորոգմանը, իսկ 1 մլրդ 441 մլն 869.0 հազար դրամը՝ Երևան քաղաքում քանդման ենթակա վթարային շենքերի բնակիչների փոխհատուցման համար բնակարանների ձեռքբերմանը: Ըստ քաղաքապետարանի հիմնավորման թեև վերջին տարիներին Երևան քաղաքում պողոտաների և փողոցների ասֆալտբետոնյա ծածկի լայնամասշտաբ վերանորոգման աշխատանքներ են իրականացվել, սակայն Երևան քաղաքում, մասնավորապես կենտրոնական հատվածներում ասֆալտբետոնյա ծածկը դեռևս բավարար որակի չէ։ Հենց դրան կուղղվի 7 մլրդ 485 մլն 24.6 հազար դրամը: Իսկ գումարի մնացած մասը կգնա վերաբնակեցման համար անհրաժեշտ նոր բազմաբնակարան շենքերի կառուցմանը, քանի որ Երևանում այժմ կան մի շարք 4-րդ աստիճանի վթարայնություն ունեցող շենքեր:
