Ռուսաստանի Դաշնության մայրաքաղաք Մոսկվա կատարած այցի շրջանակներում ՀՀ արտակարգ իրավիճակների նախարար Դ. Տոնոյանը և ՌԴ ԱԻ նախարար Վ. Պուչկովը ստորագրեցին Հայաստանի Հանրապետության արտակարգ իրավիճակների նախարարության և Ռուսաստանի Դաշնության քաղաքացիական պաշտպանության, արտակագ իրավիճակների և տարերային աղետների հետևանքների վերացման նախարարության միջև համագործակցության ակտիվացման հուշագիրը:
Ստորագրված հուշագրի շրջանակներում նախատեսվում է մշակել եւ իրականացնել տարերային եւ տեխնածին աղետների կանխարգելման և դրանց հետևանքների վերացման համատեղ ծրագրեր: Զարգացնել ՀՀ-ի և ՌԴ-ի միջև համագործակցությունը տարերային աղետների և արդյունաբերական վթարների կանխման և դրանց հետեւանքների վերացման հարցում:
Փաստաթղթում մասնավորապես ասված է. «Երկկողմ աջակցել Հայ-ռուսական մարդասիրական արձագանքման կենտրոնի գործունեությանը: Աջակցել աղետներից բնակչության պաշտպանության ոլորտին առնչվող տեղեկատվության և տեխնոլոգիաների փոխանակման: Կանոնավոր կերպով անցկացնել հանդիպումներ արտակարգ իրավիճակներում բնակչության եւ տարածքների պաշտպանության, կադրերի պատրաստման, ինչպես նաև արտակարգ իրավիճակներին արձագանքման միասնական մոտեցման ձևավորման բնագավառում փորձի փոխանակման նպատակով»:
Նշենք, որ ՀՀ ԱԻ նախարար Դ. Տոնոյանը մասնակցեց նաև «Հավաքական անվտանգություն 2017» 10-րդ միջազգային ցուցահանդեսին, որին ներկայացված էր ավելի քան 100 երկիր:
Միջոցառումը հնարավորություն է ընձեռում ներկայացնել արտակարգ իրավիճակների և անվտանգության ոլորտի տեխնիկական նորագույն ձեռքբերումներն ու առաջավոր փորձը, ինչը նպաստում է նորարությունների ներդրմանը:
