Նախկին վարչապետ Հովիկ Աբրահամյանի որդին՝ Արգամ Աբրահամյանը, ինչպես հայտնի է, «Ծառուկյան» դաշինքի ցուցակով ընտրվելով պատգամավոր՝ վայր դրեց Արտաշատի քաղաքապետի լիազորությունները։ Ակնկալվում էր, որ քաղաքապետի թափուր պաշտոնի ընտրություններն Արտաշատում կանցկացվեն հունիսի 18-ին։ Ընդ որում՝ այն բանից հետո, երբ Հովիկ Աբրահամյանը լքեց Հանրապետական կուսակցության շարքերը, և որդին էլ «Ծառուկյան» դաշինքի ցուցակով պատգամավոր դարձավ՝ շատ էր խոսվում այն մասին, որ Արտաշատում ընտրապայքարը հենց ԲՀԿ-ի և ՀՀԿ-ի միջև բավականին թեժ է անցնելու։ Արգամ Աբրահամյանը, հիշեցնենք, հայտարարել էր, որ հայրը կարող է իր թեկնածուն առաջադրել Արտաշատում։ Մամուլում տարածված տեղեկությունների համաձայն՝ այդ թեկնածուն պատգամավոր Կարինե Պողոսյանի եղբայրն է՝ փոխքաղաքապետ Դավիթ Պողոսյանը։
Նշվում է նաև, որ քանի որ խորհրդարանական ընտրություններում ՀՀԿ-ի և «Ծառուկյան» դաշինքի՝ Արարատի մարզում ստացած ձայների տարբերությունը քիչ էր, այս ժամանակահատվածը բավարար չէ վերադասավորումներ անելու համար, ուստի ընտրությունները հնարավոր է հետաձգվեն մինչև նոյեմբեր։
Կենտրոնական ընտրական հանձնաժողովի նախագահ Տիգրան Մուկուչյանը «Առաջին լրատվական»-ի հետ զրույցում պարզաբանեց, որ տեխնիկական որոշ հարցերի շուրջ ժամկետների մեջ չտեղավորվելու պատճառով ընտրությունները կանցկացվեն նոյեմբերին։ Մուկուչյանի խոսքով՝ «որևէ հետաձգում առկա չէ»։
ԿԸՀ նախագահը նշում է՝ դեռևս անցած տարի Կենտրոնական ընտրական հանձնաժողովը սահմանել էր Տեղական ինքնակառավարման մարմինների ընտրությունների հերթական օրեր, մեկը՝ հունիսի 18-ին, մյուսը՝ նոյեմբերի 5-ին. «Այդ ժամանակ դեռ ընդհանրապես խոսք չկար 2017 թվականի ՏԻՄ արտահերթ ընտրությունների վերաբերյալ։ Ընտրական օրենսգիրքը դեռ 2016 թվականին ամրագրել է կանոն առ այն, որ Տեղական ինքնակառավարման մարմինների արտահերթ ընտրություններն անցկացվում են նախապես նշանակված օրերից մեկում։ Բայց այդ օրը նշանակելիս պետք է հաշվի առնել որոշ ժամկետներ՝ մենք ունենք ժամկետներ առաջադրման, գրանցման և այլ խնդիրների հետ։ Այդ ժամկետները պետք է հնարավոր լինի պահպանել»։
Մուկուչյանն ընդգծում է. «Ակնհայտ է, որ հունիսի 18-ի մասով մի շարք ժամկետներ արդեն սպառված են՝ առաջադրում, գրանցում և այլն։ Վաղն, ըստ էության, ինքնաբացարկների վերջին օրն է, ժամկետները պահել հնարավոր չէ։ Նշանակում է, որ ընտրությունը կլինի հաջորդ սահմանված օրը, այսինքն՝ նոյեմբերի 5-ին։ Հետևաբար խոսել հետաձգման մասին՝ անտեղի է։ Դուք գիտեք, որ հունիսի 18-ին կան ընտրություններ՝ ինքնաբացարկների վերջին ժամկետը լրանում է հունիսի 8-ին, բայց ինքնաբացարկ տալու համար պետք է որպես թեկնածու ներկայանալ, փաստաթղթեր ստանալ, քարոզարշավ անցկացնել, իսկ այդ ժամկետներն արդեն սպառված են։ Հետաձգման ինստիտուտ այս պարագայում գոյություն չունի։ Ակնհայտ է, որ ամսի 18-ին այնտեղ ընտրություն չի կարող նշանակվել»,- եզրափակեց մեր զրուցակիցը։
