Հայաստանում տարեկան գլխուղեղի կաթվածի 5 հազար դեպք է գրանցվում, որոնց 50 տոկոսն ավարտվում է մահվան ելքով, իսկ հիվանդների մյուս 50 տոկոսը կյանքը շարունակում է հաշմանդամության տարբեր աստիճաններով: Այսօր ԵՊԲՀ-ում կայացած «Կաթվածի բուժումը 2013» խորագրով միջազգային գիտաժողովի ընթացքում այս մասին հայտարարեց ՀՀ առողջապահության նախարար Դերենիկ Դումանյանը:
«Կաթվածն աշխարհի ամենավտանգավոր հիվանդություններից է, որը բերում է հաշմանդամության և մահացության բարձր ցուցանիշների: Սակայն զարգացած երկրներում կաթված տարած մարդկանց թիվը մոտ է 20 տոկոսի: Հայաստանը ևս ձգտում է այս ցուցանիշին, սակայն դրան հասնելու համար դեռ շատ աշխատանք կա անելու»,- ասաց նախարարը՝ հավելելով, որ կաթվածի կանխարգելման և բուժման լավագույն երաշխիքը ժամանակակից սարքավորումներն են ու գրագետ բուժանձնակազմը:
Դերենիկ Դումանյանի տեղեկացմամբ, կաթվածի հետագա բուժումն առավել արդյունավետ է լինում, եթե բժշկական միջամտությունը կատարվում է առաջին 4.5 ժամվա ընթացքում: «Ճիշտ է, լավ նյարդավիրաբույժներ պատրաստելը դժվար գործ է, սակայն Հայաստանում այդ ոլորտի լուրջ մասնագետները քիչ չեն: Բացի դրանից, արտասահմանյան կլինիկաներում աշխատող հայ մասնագետները ժամանակ առ ժամանակ իրենց փորձը փոխանցում են այստեղի բժիշկներին»,- նկատեց ՀՀ առողջապահության նախարարը:
Գիտաժողովի մասնակից, ԵՊԲՀ նյարդաբանության ամբիոնի վարիչ, պրոֆեսոր Հովհաննես Մանվելյանն էլ իր հերթին նկատեց, որ մենք՝ հայերս, հիվանդության առաջին ախտանշանների ի հայտ գալու պահին սովոր չենք դիմել բժշկի, ինչն էլ բարդացնում է հիվանդության բուժման հետագա ընթացքը: «Մարդիկ զարկերակային բարձր ճնշմամբ ասում են, որ իրենց լավ են զգում, սովորել են իրենց այդ վիճակին և չեն դիմում մասնագետի»,- պարզաբանեց նա՝ հավելելով, որ կաթվածի կանխարգելման գործում մեծ է վնասակար սովորությունները՝ ծխելը, խմելը թողնելու կարողությունը: «Դեռ մանկապարտեզից պետք է երեխաներին սովորեցնել ճիշտ սնվել, զբաղվել սպորտով»,- նշեց պրոֆեսորը:
Լուսանկարը՝ PanARMENIAN Photo-ի
