Թուրքական Radikal թերթը, վկայակոչելով կիպրական Filelefteros թերթը, նշում է, որ Թուրքիայի արտգործնախարար Ահմեդ Դավութօղլուն 7 կետանոց վերջնագիր է ներկայացրել ԵՄ-ին։ Այն ստացել է «ԵՄ-ի արտաքին քաղաքականությանն ուղղված Թուրքիայի մահակը» անվանումը։
Նշվում է, որ հունիսի 12-ին Թուրքիայում կայանալիք խորհրդարանական ընտրություններից հետո ԵՄ-ի հետ Թուրքիայի հարաբերություններն առավել սերտացնելու և դրանք նոր հարթակ փոխադրելու համար Դավութօղլուն ներկայացրել է 7 կետերում տեղ գտած այդ առաջարկները, որոնք են.
ա) Թուրքիան պիտի մասնակցի ԵՄ-ի գագաթնաժողովներին, ինչպես մինչև 2005 թվականն էր,
բ) Թուրքիայի արտգործնախարարը պիտի մասնակցի ԵՄ-ի անդամ երկրների արտգործնախարարների ժողովներին, որոնց օրակարգում կլինեն Թուրքիային առնչվող տարածաշրջանային ու միջազգային հարցեր,
գ) Արևմտյան Բալկանների նման, պիտի տարածաշրջանային հարցերին առնչվող քաղաքական պատասխանատուների մակարդակով ոչ պաշտոնական հանդիպումներ անցկացվեն,
դ) ԵՄ քաղաքական պատասխանատուները ներառվեն ԵՄ-ին անդամակցելու թեկնածու երկրների հետ տարվող բանակցություններում, ինչպես որ մինչև 2004 թվականն էր,
ե) Բալկանների համար աշխատանքային խմբի (COWEB) հանդիպումների առավել հաճախակի կազմակերպում,
զ) ԵՄ քաղաքական և անվտանգության հարցերի հանձնաժողովի (PSC) և ԵՄ-ում Թուրքիայի մշտական ներկայացուցչության հանդիպումների առավել հաճախակիացում,
է) ռազմավարական երկխոսության շրջանակներում իրականացվելիք համագործակցության մանրամասների քննարկման համար կոմիտեի ստեղծում։
Հիշեցնենք, որ 1999 թվականի դեկտեմբերի 10-ին ԵԽ-ի` Հելսինկիում տեղի ունեցած գագաթնաժողովում Թուրքիային շնորհվեց ԵՄ-ին անդամակցելու թեկնածու երկրի կարգավիճակ:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում:
Ներկայումս ԵՄ-ին Թուրքիայի անդամակցելու հարցում եվրոպական երկրներին պետք է բաժանել 3 խմբի՝ այդ գործընթացի կողմնակիցներ (Մեծ Բրիտանիա, Իտալիա և այլն), հակառակորդներ (Գերմանիա, Ֆրանսիա, Կիպրոս և այլն) և չկողմնորոշվածներ (Դանիա և այլն):