Քաղաքագետ, ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը կարծիքով, ԼՂ հարցում արագ լուծումների ակնկալիքները տեղին չեն, քանզի դրա համար որևէ տարբերակ չկա: «Առաջին լրատվական»-ի հետ զրույցում նա նկատեց, որ ԵԱՀԿ Մինսկի խմբի համանախագահող երկրների նախագահների վերջին հայտարարության մեջ շատ կարևոր մի հանգամանք էր նշված. «Շեշտվում է բանակցությունների այլընտրանքի բացակայության մասին, սակայն այն, թե ի՞նչ լուծում կստանա խնդիրը, և արդյոք այն կլինի՞ արագ, պարզ չէ, և դրանում ես դեռ այնքան էլ վստահ չեմ»:
Անդրադառնալով այն գնահատականներին, թե ներքաղաքական խնդիրների կարգավորումը, ընդդիմություն-իշխանություն երկխոսությունը Սերժ Սարգսյանին հնարավորություն կտան վճռական քայլեր կատարել ԼՂ հարցի կարգավորման ասպարեզում՝ Մարկարովը նշեց, որ Ղարաբաղյան խնդրի հետ կապված էական տարբերություններ ընդդիմության և իշխանության միջև չկան և չեն էլ եղել. «Ե՛վ իշխանությունը, և՛ ընդդիմությունը հնչեցնում են նմանատիպ մոտեցումներ ԼՂ հարցի կարգավորման վերաբերյալ՝ ընդգծելով այն հանգամանքը, որ ԼՂ արդեն վաղուց ինքնորոշվել է: Տվյալ պարագայում ներքին քաղաքական հարցերի մեջ համերաշխ հիմքերի ձևավորումը ստեղծում է ավելի ուժեղ, ավելի լուրջ համերաշխություն արտաքին ասպարեզում»:
Հարցին, թե ներքաղաքական լարվածության հաղթահարման և երկխոսության ողջյունները միջազգային հանրության կողմից նպատակ են հետապնդում ԼՂ հարցում ավելի արագ գործողությունների մղելու հայկական կողմին, Մարկարովը պատասխանեց. «Անուղղակիորեն այդ մասին վկայում է այն փաստը, որ Դովիլում արված հայտարարության մեջ նշվում է, թե ժողովրդին պետք է պատրաստել ոչ թե պատերազմի, այլ խաղաղության: Այս արտահայտությունը ևս միտված է որոշակի համաձայնողական դաշտի ձևավորմանը որոշակի հարցերի շուրջ. մի կողմից՝ խոսք կա արտաքին խնդիրների, մյուս կողմից՝ ներքին քաղաքականության հետ դրա կապվածության մասին: Իսկ այս իմաստով ներքին քաղաքականությունն Հայաստանում միշտ դիրքորոշված է եղել արտաքին մարտահրավերներին և հիմնախնդիրներին»։