«Ես կարծում եմ, որ Վահան Մարտիրոսյանը հետապնդում է նեղ անձնական նպատակներ, որովհետև նրա այդ հայտարարությունը, որն ուղղված էր հայ հասարակությանը՝ չտրվել Բաքվի այդ խաղաղության պլատֆորմին, որ դա թակարդ է, և այլն, և այլն… ճիշտ ասած՝ Հայաստանում այդպիսի խանդավառ վերաբերմունք չի էլ եղել Բաքվի պլատֆորմի նկատմամբ։ Ակնհայտ էր, որ խաղաղության այդ պլատֆորմն ադրբեջանական իշխանությունների մեծ ծրագրի մի հատվածն էր, որը բացարձակապես խաղաղության հասնելու նպատակ չի հետապնդում, այլ Հայաստանին շանտաժի ենթարկելու ծրագրի բաղադրիչն է, իսկ Բաքվից քաղաքական ապաստան խնդրած այդ մարդիկ նման ծրագրի մի մասն են եղել։ Վահան Մարտիրոսյանի այդ ուղերձը զուտ նեղ անձնական նպատակ է հետապնդում՝ ինչ-որ կերպ արդարացնել իր գործողությունները՝ իբրև թե խանգարելու այդ պլատֆորմին և այլն»,- «Առաջին լրատվական»-ի հետ զրույցում նշեց «Ռեգիոն» հետազոտական կենտրոնի տնօրեն Լաուրա Բաղդասարյանը՝ անդրադառնալով օրերս համացանցում Վահան Մարտիրոսյանի տարածած տեսաուղերձին։ Հիշեցնենք, որ վերջինս ավելի վաղ քաղաքական ապաստան էր խնդրել ադրբեջանական իշխանություններից։
Տիկին Բաղդասարյանի խոսքերով՝ Բաքվի խաղաղության պլատֆորմը, դեռ չհասունացած ու չձևավորված, միանգամից փուչիկի նման պայթեց, և ադրբեջանական իշխանությունները այդ պատմությունը ինչ-որ ձևով փակելու կարիք ունեին։ Ու հնարավոր է, որ Վահան Մարտիրոսյանը հիմա այդ պատմության վարագույրը փակելու սցենարի մասնակիցն է։ Վերլուծաբանի գնահատմամբ՝ այդ ամբողջ պատմությունն ինքնին աբսուրդային է։
«Անմեղսունակ է պետք լինել չհասկանալու համար, որ եթե դու գնում ու հանձնվում ես Բաքվի իշխանություններին և այնտեղից սկսում ես խաղաղության կոչեր անել, ապա դա մի մեծ քաղաքական խաղ է, որի մեջ դու որպես գործիք ես օգտագործվում, և այդ գործիքը մինչև վերջ օգտագործելուց հետո շպրտում են մի կողմ կամ լավագույն դեպքում՝ դարակում են պահում»,- նկատեց Լաուրա Բաղդասարյանը։
Վերջինս չի կիսում այն տեսակետները, թե սա կարող է մեծ հասարակական ռեզոնանս ունենալ Ադրբեջանում, կամ ադրբեջանական հասարակությունը կսկսի ընդվզել զրո արդյունք տված այդ պլատֆորմի վրա ծախսված գումարների համար։
«Ադրբեջանում այնքան են տարբեր ծրագրերի վրա անիմաստ գումարներ մսխվել, որ նրանց հասարակությունը վաղուց արդեն սովորել է այդ ամենին և նույնիսկ իրենց իրավունքների ոտնահարման դեմ հրապարակայնորեն չի ընդվզում, ուր մնաց թե ինչ-որ Վահան Մարտիրոսյանի կամ հայերի հետ խաղաղության պլատֆորմի փլուզման պատճառով ներքաղաքական կամ ներհասարակական խմորումներ առաջանան»,- ընդգծեց «Ռեգիոն»-ի տնօրենը։
Հարցին՝ տվյալ պարագայում ինչպիսի՞ն պետք է լինի հայաստանյան կողմի արձագանքը նման ուղերձներին, արդյոք ճի՞շտ է տարածելը կամ առհասարակ քննարկելը, տիկին Բաղդասարյանը պատասխանեց. «Թող լինի այնպես, ինչպես ընթանում է, այսինքն՝ ով ուզում է արտահայտվել, թող արտահայտվի, իսկ ով ոչ՝ ոչ։ Մարդիկ կան, որ կարծում են՝ չարժե նույնիսկ խոսել դրա մասին, և հենց այդպես էլ անում են։ Կարծում եմ, որ ընդհանրապես Հայաստանում մարդիկ այնքան զգոն են, որ չեն կարող ընկնել այդ ծուղակը։
Այս մարդիկ, ովքեր գնացել են Բաքու, այստեղ իշխանությունների հետ խնդիրներ են ունեցել, ինչ-որ քրեական կեղտոտ պատմությունների մեջ են խառնված եղել, և այնտեղ գնալու պատճառը հավանաբար դա է եղել, ես այդպես եմ ենթադրում»։
Մանրամասները՝ տեսանյութում։
https://www.youtube.com/watch?v=r1pD-7AedOA
