Երեկ Վանաձորի ավագանու ՀՀԿ-ական և ՀՅԴ-ական անդամները կրկին առանց մեծամասնության, առանց քվորումի ավագանու նիստ էին գումարել: Օրակարգում մի քանի հարց է եղել՝ ճանապարհների անվանակոչում, պարգևների տրամադրում, ինչպես նաև Եվրամիության հետ համագործակցության հարց:
Մինչդեռ Վանաձորի ավագանու «Լուսավոր Հայաստան» խմբակցության անդամ Քրիստ Մարուքյանի խոսքով՝ Վանաձորում ներկայումս այնքան կարևոր հարցեր կան, և դրանց չանդրադառնալն ու փոխարենը փողոցներ անվանակոչելը կամ ինչ-որ հեռահար հարցեր քննարկելը, մասնավորապես՝ Եվրամիության հետ համագործակցության հարցը, լուրջ չէ: Մարուքյանը դեմ չէ, որ Վանաձորի ավագանին համագործակցի Եվրամիության հետ, սակայն նրա խոսքով՝ եթե եվրոպական համագործակցության ծրագրերին մասնակցելու ցանկություն կա, ապա պետք է հարգվի նաև պառլամենտարիզմի սկզբունքը, այն է՝ մեծամասնությունը պետք է իշխանություն ունենա, և մեծամասնության կողմից պետք է բանեցվի այդ իշխանությունը:
«Բայց մեր հարգարժան այրերը չեն հարգում այս սկզբունքները և, ունենալով փոքրամասնություն, ցանկանում են Եվրոպական միության հետ համագործակցության ծրագրեր մշակել: Չգիտեմ՝ դա ոնց կընկալվի Եվրոպական միության կողմից, քանի որ եթե համագործակցում ես մի համակարգի հետ, ապա պետք է հարգես այդ համակարգի մշակած արժեքները»,- «Առաջին լրատվական»-ի հետ զրույցում ասաց Քրիստ Մարուքյանը:
Մեր դիտարկմանը՝ հնարավոր է Վանաձորի ավագանին, ի դեմս քաղաքապետ Մամիկոն Ասլանյանի, չի գնում լուրջ հարցերի քննարկման և հաստատման, քանի որ դեռ չլուծված խնդիր կա մեծամասնության հետ, Մարուքյանը նկատեց. «Չեմ կարծում, որ իրենց պահող խնդիր կա, որովհետև իրենք տարվա կեսին հաստատում են բյուջե, որի իրավունքը չունեին: Բյուջետավարման մասին օրենքը հստակ սահմանում է, որ եթե բյուջեն չի հաստատվում մինչև տարվա վերջ, ապա եկող տարվա ծախսերը կատարվում են նախորդ տարվա չափերով և համամասնությամբ: Այսինքն՝ եթե բյուջեն չէր հաստատվել, և մենք գիտենք, որ չէր հաստատվել, այն դեպքում, երբ նման կանոնակարգում օրենքը չի տալիս, ապա իրավունք չունեին իրենք դա հաստատելու: Բայց գնացել են դրան, հաստատել են բյուջեն, տարվա զարգացման պլանը, որոնք երկուսն էլ լուրջ փաստաթղթեր են և իրենցից բավականին պատասխանատու քայլեր են ներկայացնում:
Ի դեպ, «Լուսավոր Հայաստան»-ը, ԲՀԿ-ն և ՀՎԿ-ն շարունակում են բոյկոտել Վանաձորի ավագանու նիստերը: Վերջիններս պատրաստվում են դիմել Սահմանադրական դատարան, որպեսզի, ի վերջո, իրավական որոշակիություն մտցվի հարցում, թե կարո՞ղ են արդյոք Վանաձորի ավագանու ՀՀԿ և ՀՅԴ խմբակցությունները, չունենալով մեծամասնություն, նիստ գումարել և որոշումներ ընդունել:
Վանաձորի քաղաքապետ Մամիկոն Ասլանյանի հետ խոսել մեզ այդպես էլ չհաջողվեց:
