«Այսօր Հայաստանն այլընտրանք չուներ. եթե մենք չունենք այլընտրանք, պետք է ամրապնդենք այն, ինչ ունենք»,- այսօր լրագրողների հետ հանդիպմանը ասաց ՀՅԴ Գերագույն մարմնի անդամ Արմեն Ռուստամյանը՝ անդրադառնալով Հայաստանի՝ Մաքսային միությանը անդամակցելու հարցին:
Նա նշեց, որ Հայաստանում արտաքին քաղաքականության վեկտորը փոխվել է: Նրա խոսքով՝ մենք գնում ենք Եվրասիական միություն, որը նշանակում է աշխարհաքաղաքական բևեռի ձևավորում, որում առանցքային դերակատարում ունեն Չինաստանը և Ռուսաստանը:
Անդրադառնալով Վահան Հովհաննիսյանին Գերմանիայում ՀՀ դեսպան նշանակելու հարցին՝ Արմեն Ռուստամյանը նշեց, որ այս առաջարկը Վահան Հովհաննիսյանին արվել է՝ հստակ իմանալով նրա տեսակետները:
«Մենք հիմա այնպիսի թեմա ենք առաջ քաշել, որ տարաձայնությունների առիթ չտանք, ինչքան հնարավոր է՝ միավորվենք»,- ասաց նա՝ հղում անելով իրենց առաջարկած արտագաղթի կանխման ծրագրին:
Նրա համոզմամբ՝ երկիրը այս վիճակից միայնակ հնարավոր չէ դուրս բերել, պետք է ընդդիմությունը հույս առաջացնի, այլընտրանք լինի:
Հարցին՝ այդ դեպքում ի՞նչն է խանգարում ՀՅԴ-ին մտնել կոալիցիա, Արմեն Ռուստամյանը վկայակոչեց արտագաղթի կանխման իրենց առաջարկած կետերը:
Լուսանկարը՝ PanARMENIAN Photo-ի
